Осыған сәйкес Талдықорған қаласында салтанатты басқосу өтті. Онда аталған бағдарламаны тиімді пайдаланған аймақтағы Өтенай ауылының тұрғыны Тимофей Хохловқа арнайы жоғары оқу орнының білім гранты табыс етілді. Басқосуда жас сабазды жүрекжарды қуанышымен құттықтаған қала әкімінің орынбасары Жеңіс Андабеков ізгі тілегін жеткізді. Осыдан соң ол азаматты шаһар басшысының Алғыс хатымен марапаттады.
Сала басшыларының сөзінше, Тимофей Александр 2024 жылдың 24 сәуірінде мерзімді әскери қызметке шақырылған. Маңғыстау облысы, Ақтау қаласындағы №29011 әскери бөлімінде азаматтық борышын абыроймен өтеген жалынды жас барлық тапсырмаларды ойдағыдай орындап, өзінің ұтқырлығымен көзге түскен. Соның нәтижесінде жас сарбаз осы жолы «Срочник 2.0» бағдарламасы аясында жоғары оқу орнының грантын жеңіп алған. Тимофей «Срочник 2.0» бағдарламасы аясында жоғары оқу орнына түсуге мүмкіндік алған өңірдегі екінші сарбаз.
– Бұл бағдарлама әскери борышын өтеуші жастар үшін аса тиімді. Мен осы бағдарлама туралы жергілікті Қорғаныс істері жөніндегі департаменттен білдім. Біз әскерге аттанар алдында «Срочник 2.0» бағдарламасы туралы ақпараттық түсіндіру жұмыстары жүргізілген еді. Осыдан соң мен өзіме нақты талаптар қойып барлық тапсырмалар мен нормативтерді жақсы орындауға тырыстым. Енді, міне, сол еңбегімнің жемісін көріп, жоғары оқу орнының грантын жеңіп алып отырмын. Бұл – мен үшін үлкен мақтаныш, – дейді жас сарбаз.
Айдын КӘЛІМХАН
