Аймақ басшысы облыстық полиция департаментінің әкімшілік ғимаратына барып, ондағы арнайы техникалар мен құрал-жабдықтар көрмесімен танысты. Көрмеде «Арлан» арнайы мақсаттағы бөлінісінің, кинологиялық қызметтің, жылдам қимылдайтын арнайы жасақтың арнайы мақсаттағы бөлінісінің қару-жарақтары, әскери техникалары қойылды. Қазақстанда жасалған «Алан – 2» және ресейлік «Тигр» арнайы машиналары да көрмеде таныстырылды. Жиналған қауым департамент аумағына орнатылған ерлікпен қаза тапқан тәртіп сақшыларының ескерткішіне гүл шоқтарын қойып, олардың рухына тағзым етті.
Бұдан әрі салтанатты шара облыс орталығындағы І. Жансүгіров атындағы Мәдениет сарайында жалғасты. Сахна төріне полиция департаментінің Жауынгерлік туы кіргізіліп, Мемлекеттік гимн орындалды. Жиналған тәртіп сақшыларын облыс әкімі Бейбіт Исабаев кәсіби мерекесімен құттықтады.
– Жетісу облысының дербес облыс ретінде құрылғанына биыл үш жыл толды. Облыстың осы уақыт ішіндегі әлеуметтік-экономикалық салалардағы жетістіктеріне қоғамдағы тұрақтылықтың арқасында қол жеткізілді. Сондықтан осы орайда облыстың дамуына қосқан елеулі үлестеріңізді ерекше атап өткім келеді. Сіздердің кәсіби шеберліктеріңіз, табандылықтарыңыз және азаматтық борыштарыңыз – елдегі тыныштық пен тұрақтылықтың сенімді тірегі.
Бүгінгі салтанатты күні Сіздерге зор денсаулық, отбасыларыңызға амандық, ел игілігі жолындағы қызметтеріңізге толағай табыс тілеймін, – деді аймақ басшысы.
Облыс әкімі жыл сайын өз саласында үздік атанған 3 полиция қызметкерін «Үздік қызметі үшін» номинациясымен марапаттау туралы шешім қабылдағанын айтып, жергілікті полиция қызметкерлеріне марапаттар тапсырды. «Үздік қызметі үшін» номинациясы Талдықорған қаласы полиция басқармасының тергеушісі, полиция аға лейтенанты Еңлік Базарбаеваға, Ақсу ауданы полиция бөлімінің учаскелік полиция инспекторы, полиция капитаны Ерік Наваевқа, Көксу ауданы полиция бөлімінің жедел уәкілі полиция капитаны Ғабит Мұқановқа берілді. Оларға арнайы статуэтка табысталды. Адам құтқаруда батылдық пен батырлық көрсеткені үшін жылдам қимылдайтын арнайы жасақтың аға инспекторы, полиция майоры Мирас Даутовқа ҚР Премьер-Министрінің «Алғыс хаты» табысталды. Сол сияқты облыс әкімінің Құрмет грамотасы мен «Алғыс хатпен» де марапатталды.
Жетісу облысы полиция департаментінің бастығы, полиция генерал-майоры Сарқытбай Құсайынов соңғы жылдардағы жүйедегі өзгерістердің арқасында халықтың сақшыларға деген сенімі артып, азаматтар арасында полицияның беделі өскенін айтты. Жетісу облысының полиция департаменті республика көлемінде рейтинг бойынша алдыңғы қатарда тұрғанын атап, полиция қызметкерлеріне Ішкі істер министрлігінің марапаттары мен атақтарын табыстады.
Мирас ДАУЫТОВ, полиция майоры
– Полиция департаментінде жұмыс істегеніме 15 жыл болды. Қалада үй өртену оқиғасы кезінде бірнеше қызметкермен бірге өрттен 3 баланы құтқаруға қатыстым. Сол әрекетімді бағалап, марапаттап жатқандарына көп рақмет. Мен ерлік жасадым демеймін, өзімнің азаматтық, қызметтік борышымды өтедім деп есептеймін. Полиция қызметіне келгісі келетін жастарға айтарым, спортпен шұғылданып, дене шынықтыру керек, заңды біліп, көркем әдеби кітаптар оқып, ой-өрісін жетілдіруге де көп көңіл бөлген дұрыс. Әріптестерімді кәсіби мерекелерімен құттықтаймын!
Еңлік БАЗАРБАЕВА, Талдықорған қаласы полиция басқармасының тергеушісі, полиция аға лейтенанты
– І. Жансүгіров атындағы Жетісу университетінің заң факультетін, Теміртаудағы полиция академиясын бітірдім. Оқу бітіргеннен бергі үш жылда Талдықорған қаласы полиция басқармасында тергеуші болып жұмыс істеймін. Жұмысымыз оңай емес, дегенмен бұл мамандыққа жүрек қалауымен келдім. Бұл марапат – менің қызмет ету барысында алған тұңғыш марапатым. Сондықтан мен үшін маңызы үлкен.
Еңлік КЕНЕБАЙ
