Панфилов ауданындағы егін негізінен суармалы алқаптарда өсіріліп, өнім алынатындықтан суландыру жүйесінің рөлі ерекше. Бұл өңірдегі негізгі өндіріс көзі – жүгері дақылының тұқымы да алдымен суарылған жерге ғана себіледі. Одан кейінгі өніп, өсу кезеңдерінде де өңірдегі күннің ыстықтығы, топырақтың құрғақ, сортаң болып келетіндігінен өсімдік суды көп қажет етеді. Орта есеппен жүгері жетілгенше 5-7 мәрте, тіпті кейбір құмдауыт, тастақ жерлерде 10 ретке дейін суарылып тұруы шарт. Өңірде өсірілетін басқа дақылдардың да суға деген сұранысы жоғары.
Соңғы жылдары құрғақшылықтан, су тапшылығынан, аудан шаруашылықтары мен шаруа қожалықтарының көбеюінен су бөлуде күрделі мәселелер туындап, егіншілер қажетті мөлшерде суару жұмысын атқара алмай жүрген. Бұл мәселені аудандағы су шаруашылығы қызметкерлері қожалықтарға берілген су мен уақытты тиімді пайдалануды реттеу арқылы жолға қойды. Алайда жыл өткен сайын бұрынғы су жолдары тозып жарамсыздана бастағандықтан айтарлықтай тауқыметтер туындап отыр. Бұған биылғы жаз маусымындағы құрғақшылық салдарынан өзендердегі су деңгейінің төмендеп кетуі де кері әсерін тигізуде.
«Қазсушар» шаруашылық жүргізу құқығындағы республикалық мемлекеттік кәсіпорнының Жетісу облыстық филиалына қарасты Панфилов өндірістік учаскесі егін егетін қожалықтармен түгел келісімшарт жасасқан. Өңірде жалпы 37940 гектар суармалы егістік бар болса, соның 23 мың гектардан астамына жүгері дақылы өсіріледі. Шілде айының ортасына дейін «дала аруының» алғашқы суару жұмыстары толық аяқталып, 20125 гектарға жуығы екінші, 3 мың гектарға жуығы үшінші суын ішіп үлгерді.
Бір сөзбен айтқанда, егістікті уақыт оздырмай суарып алу мен судың әр тамшысын тиімді пайдалану бағытында өңірдегі қожалықтар мен су мамандарының арасында мызғымас тәртіп орнатылған. Тіпті бұрын бақылаудан тыс қала беретін аяқсуды да айдалаға ағызбай қайта арналап, пайдаға жарату шаралары да қарастырылыпты. Осындай ықтиятты қарекеттер егістіктердегі су тапшылығын барынша азайтумен қатар әр литр есепке алынып, оны пайдаланған егіншілерден су ақысы толығымен алынғандықтан жаркенттік мұраптар толайым табыс түсіріп жүр. Табыстың кілті – әр литрді су өлшейтін арнайы құралмен есептеуімен және мамандардың сауатты іс атқаруымен байланысты.
Осындай жүйелі жұмыстардың нәтижесінде майлы дақылдар мен көкөніс, бақша және көпжылдық шөп алқаптары екі мәрте толық суарылды. Аудандағы жеміс бақтары екі мәрте суарылып, 2 мың гектары үшінші суын ішті.
Мырзағали Нұрсейіт
Панфилов ауданы
