Мемлекет басшысы Қасым-Жомарт Тоқаев судья және сот қызметкері күнімен құттықтады, деп хабарлайды 7-su.kz ақпараттық порталы Massaget.kz сайтына сілтеме жасап.
Президент өз құттықтауында биылғы жылдың сот саласы үшін ерекше маңызға ие екенін атап өтті. 2025 жылы Қазақстан Конституциясының қабылданғанына 30 жыл толып отыр. Бұл құжат ел егемендігінің, азаматтардың құқықтары мен бостандықтарының мызғымас тірегі ретінде бағаланады.
«Қуатты әрі тәуелсіз сот жүйесі – құқық үстемдігін қамтамасыз етуде, сондай-ақ «Заң және тәртіп» қағидатын орнықтыруда шешуші рөл атқарады. Сондықтан біз осы стратегиялық маңызы бар салада жүйелі түрде реформа жүргізіп келеміз. Сот ісі жетілдіріліп, басқару үдерістері оңтайландырылып, осы салаға цифрлық технологиялар енгізіліп жатыр», – деді Мемлекет басшысы.
Жаңа сот құрылымы іске қосылады
Президенттің айтуынша, 2025 жылдың 1 шілдесінен бастап елімізде қылмыстық, азаматтық және әкімшілік істер бойынша үш дербес кассациялық сот жұмысын бастайды.
«Бұл қадам азаматтар мен бизнестің өз құқықтары мен заңды мүдделерін қорғауға арналған институционалдық мүмкіндіктерін едәуір арттырады», – деді Тоқаев.
Сондай-ақ Президент сот төрелігінің әділетті атқарылуы судьялардың кәсіби біліктілігіне, бейтараптығына және ұстанымына тікелей байланысты екенін атап өтті.
«Бұл маңызды әрі жауапты миссия терең құқықтық білімді, заң үстемдігін бәрінен биік қоюды талап етеді. Сот қызметкерлері мен ардагерлеріне қажырлы еңбегі мен кәсібіне адалдығы үшін шынайы ризашылығымды білдіремін. Сіздер Әділетті Қазақстанды құру ісіне өлшеусіз үлес қоса бересіздер деп сенемін», – деді Мемлекет басшысы.
Сөз соңында Қасым-Жомарт Тоқаев судьялар мен сот саласының қызметкерлеріне зор денсаулық, бақ-береке және табысты еңбек тіледі.
