Түбі терең тарихтан, сары алтындай сарқылмас сарыннан нәр алған домбыра қазақ баласының жанын тербетіп, көңілінің күретамырында тамыр тартып тұрған киелі мұра. Осы асыл аманатқа арналған Ұлттық домбыра күніне орай Журналистер үйінде өткен баспасөз мәслихаты да саздың салтанат құрған сәті болды.
Жиын тізгінін облыстық мәдениет, архивтер және құжаттама басқармасының басшысы Қуаныш Сүлейменов алып, қазақ рухының ұлы көші домбыра туралы кең көсіліп сөз қозғады. Жиында сөз алған облыстық Д. Рақышев атындағы филармония директоры Самат Жексембаев елден бұрын домбыраның тілін сөйлетті. Иә, Дина Нұрпейісованың «Науысқы» күйін ойнап, осы бір рухани мәжілістің тынысын түріп, көңілдің көлеңкесін сейілткендей болды.
І. Жансүгіров атындағы Мәдениет сарайының директоры Әли Алпысбаев:
– Домбыра күніне деген дайындық облысымызда қарқынды жүріп жатыр. Бұл деген баба үнінің қайта жаңғыруы. Домбыра деген қазақтың өзі ғой. Тіпті, күллі әлемнің жүрегіне жеткен үн осы домбыраның үні емес пе?! – деп тебіренді.
Шынында да шанағы шерге толы, қос ішектің қуатынан құдірет тапқан бұл аспап кешегі дала философиясының, көшпелі өркениеттің тілі еді. Домбыра сал-серілердің серігі, жыраулардың жаршысы, батырлардың серттесі. Бір уыс ағаштан жаралғанмен бүкіл ғаламға қазақтың көкірегіндей кеңдік сыйлайтын бұл ғажап дүниенің алғаусыз қадірін тану бүгінгі ұрпақтың мойнындағы аманат.
Санжар СҰЛТАНҒАЗЫ
