ҚР ҰҚК Шекара қызметінің Жетісу облысы бойынша департаментіне қарасты Алакөл ауданы бойынша шекара басқармасының бастамасымен 1941 жылдың маусымында Ұлы Отан соғысы басталған сәтте ерлікпен қаза тапқан шекарашыларды еске алуға арналған салтанатты митинг өткізілді.
Шараға шекара басқармасының офицерлері, келісімшарт негізінде қызмет ететін әскери қызметшілер, жас сарбаздар мен ардагер шекарашылар қатысты. Митинг аясында шекара шебінде жауға алғашқылардың бірі болып қарсы тұрған, Отан қорғау жолында жанын құрбан еткен жауынгерлер рухына тағзым етіліп, ескерткішке гүл шоқтары қойылды.
Салтанатты жиын барысында әскери басшылық өкілдері мен ардагерлер сөз сөйлеп, жас буынды отансүйгіштікке тәрбиелеудің маңыздылығына тоқталды. Батыр бабалардың ерлігі – әскери қызметшілер үшін мәңгілік өнеге, ал ел қорғау жолындағы қызмет – қасиетті борыш екені ерекше атап өтілді.
Митингте шекара тарихындағы ерен ерліктер еске алынып, қаза тапқан жауынгерлерге бір минут үнсіздік жарияланды.
Бұл тағылымды іс-шара шекара қызметінің даңқты тарихын ұлықтап, жас ұрпаққа рухани серпін беретін, патриоттық рухты қалыптастыратын маңызды дәстүрлердің бірі саналады.
ҚР ҰҚК Шекара қызметі
Жетісу облысы бойынша департаменті
