Ескелді ауданының әкімі Елдос Ахметов пункттің ашылу салтанатында:
– Береке-бірлігі кетпеген, дархан көңілі алыстан көрінетін ауылдың тіршілігі қыз-қыз қайнап, заман ағымына сай түрленіп келеді. Осыған дейін дәл осы ауылда балалар ойнайтын алаң ретке келсе, көптен бері аузында құлпы тұрған балабақша ашылып, жұмысы қайта жанданды. Ауылға газ толық тартылған. Кезеңімен реттеліп жатқан іс бүгін фельдшерлік-акушерлік пункттің ашылуымен жалғасты. Алдағы уақытта тағы да бірқатар істі жоспарлап отырмыз, – деді өз сөзінде.
«Ауылда денсаулық сақтауды жаңғырту» ұлттық жобасы аясында салынып, Астана күніне орай пайдалануға берілген фельдшерлік- акушерлік пункттің ашылуында сөз алған облыстық денсаулық сақтау басқармасы басшысының орынбасары Жанетта Нұрманбетова мамандардың біліктілігіне сенім білдіріп, заманауи құрылғыларды меңгергендігін айтты. Артынша ауыл ақсақалдары кеңесінің төрағасы Нұржан Кенжебекұлы игілікті істі батамен бастап, жаңа нысанға аяқ басқан жандарға тілек білдірді. Жаңа нысан халыққа амбулаториялық-емханалық, алғашқы медициналық-санитарлық, шұғыл және профилактикалық қызметтер көрсетеді. Фельдшерлік-акушерлік пункт бір ауысымда 15 адамды қабылдай алады. Есеппен 1 дәрігер, 3 орта, 2 кіші медицина қызметкері жұмыс істейді.
Ескелді ауданында биыл бес нысан жоспарланса, соның ішінде Шымыр мен Матай Байысов ауылындағы медициналық пункт пайдалануға берілді. Ал Жастар, Жалғызағаш, Қайнар ауылдарындағы нысандардың құрылысы қыркүйекте аяқталады деп жоспарланған.
Серік ҚАНТАЙ
