Қазақстанда жаңа оқу жылы қарсаңында білім беру жүйесіне бірқатар маңызды өзгерістер енгізілуде, – деп хабарлайды 7-su.kz ақпараттық порталы.
Елімізде оқу процесін оңтайландыру, мектеп қабырғасындағы қауіпсіздікті арттыру мен муғалімдердің мәртебесін қорғау бағытында кешенді қадамдар жасалып жатыр. Биылғы өзгерістердің басты мақсаты – сапалы білім беру және қала мен ауыл мектептері арасындағы алшақтықты жою.
Бастауыш сыныптардағы, яғни 1-4 сыныптар аралығындағы Тоқсандық жиынтық бағалау (ТЖБ) толығымен тоқтатылды. Енді оқушының күнделікті еңбегін бағалайтын формативтік бағалаудың тоқсандық бағадағы үлесі 25%-дан 50%-ға дейін өседі. Ал оқу бөлімдерін меңгеру деңгейі аралық бағалау арқылы анықталады. Сондай-ақ мектептерде «Конституция негіздері» (5-7 сынып), «Заң және тәртіп» (8-11 сынып) және «Жеке қауіпсіздік» (5-11 сынып) сияқты жаңа міндетті курстар енгізіледі.
Оқу процесіне жасанды интеллект де қарқынды енгізілуде. 2026-2029 жылдарға арналған кешенді жоспар аясында пилоттық мектептерде AI-технологиялар оқыту құралы ретінде қолданылады. Бұл жүйе мұғалімді алмастырмайды, тек баланың біліміндегі олқылықтарды анықтауға көмектеседі. Ал оқушылардың сабақ үстінде гаджет қолдануына шектеу қойылды: 7-сыныпқа дейінгі балалар сабақ кезінде смартфондарын арнайы жәшіктерге немесе мұғалімге тапсыруы тиіс.
Педагогтердің заңды құқықтары да күшейтілді. Енді мұғалімдер баланың өмірі мен денсаулығына тек оқу-тәрбие процесі жүріп жатқан уақытта ғана жауап береді. Кешкі уақытта, демалыс күндері немесе жазғы каникулда оқушының қауіпсіздігіне тікелей ата-анасы жауапты. Оған қоса, мұғалімдерді өз міндетіне жатпайтын әкімшілік немесе қоғамдық жұмыстарға жегуге қатаң тыйым салынды. Қазіргі жұмыс істеп жүрген педагогтер үшін пәндік тест тапсыру талабы жойылып, аттестацияның жаңа моделі іске қосылды.
Елімізде 2025-2027 жылдары 1300 мектепті жаңғырту жоспарланса, оның басым бөлігі – ауылдық елді мекендегі білім ошақтары. Себебі еліміздегі мектептердің 67%-ы ауылда орналасқан, онда 1,6 млн бала білім алуда. Бағдарлама ауыл балаларына заманауи жағдай жасауды көздейді. Жаңа оқу жылы 1 қыркүйекте басталып, 25 мамырда аяқталады.
