«ЖАНСАЯ». Бұл Алакөл ауданына қарасты Ақши ауылындағы «Жансая» сауықтыру лагері. Көпшіліктің жанына сая болған орталық жаңа маусымдағы жұмысын бастады. Мұнда 300-ге тарта оқушы жазғы демалысын өткізеді. Балалар шипалы көл жағасында тынығып, білімін шыңдайды. Демалыс аймағы заманауи құрал-жабдықтармен қамтамасыз етілген. Балаларға арналған түрлі интеллектуалды ойын ұйымдастырылып, денсаулығын жақсарту жұмыстары жүргізіледі.
«Жансая» сауықтыру лагері орталықтың балансына өткен аудан әкімдігінің бұрынғы резиденциясында орналасқан. Оңалту орталығының негізгі мақсаты – медициналық, психологиялық оңалту шараларын жүргізу арқылы ерекше қажеттіліктері бар балалардың әлеуметтік жағдайын қалпына келтіру және оларды әлеуметтік ортаға бейімдеу.
– Бүгінгі таңда лагерь қызметкерлері балаларға барлық жағдайды жасауда. Биыл алғаш болып Талдықорған және Панфилов ауданының балалары демалуға келді. 32 адамға есептелген, ыңғайлы пандустармен жабдықталған бірқабатты ғимаратта 6 жатын бөлме, 2 ойын бөлмесі, медициналық пункт, әкімшілік кабинеттер, асхана бар. Бүкіл лагерь аумағына бейнебақылау орнатылған. Ашық ойын алаңы, жақын жерде жабық бассейн де қарастырылған. Кішкентай науқастар үшін су, музыка, ойын және арттерапия да жоқ емес. Ең бастысы, балалар шипалы Алакөл суына түсіп, уақыттарын тиімді өткізеді, – дейді орталық директоры Берік Серғазин.
2023-2024 жылғы маусымда лагерьде тек Алакөл ауданынан ғана емес, өңірдің басқа аймақтарынан 6 мен 18 жас аралығындағы 350-ден астам адам демалып, сауықтыру курстарынан өткен. Таяуда ерекше қажеттіліктері бар балаларға арналған жазғы сауықтыру лагерінің үшінші маусымының салтанатты ашылу рәсімі өтті. Орталық басшысы Берік Серғазин, балалар шығармашылық орталығының директоры, ҚР еңбек сіңірген мәдениет қайраткері Әсия Уалиева, «Жансая» лагерінің жетекшісі Бағдагүл Баекеновалар құттықтау сөз сөйлесе, лагерь қызметкерлері есте қаларлық театрландырылған қойылым көрсетті.
Балалар мен ата-аналар биылғы маусымда 9 кезең бойынша 4 күндік ем алады. Биыл шамамен 320-ға жуық адамды демалту және оңалту үшін лагерь ұжымы өз жұмысына дайын.
Еңлік КЕНЕБАЙ,
Алакөл ауданы
