Солардың бірі – жасөспірімдер арасында салауатты өмір салтын насихаттау және есепке алынған кәмелетке толмағандардың бос уақытын тиімді ұйымдастыру жөніндегі жұмыстар болды. Бұл тақырып бойынша облыстық білім басқармасының басшысы Дәурен Жүнісов баяндама жасады.
Оның айтуынша, бүгінде облыс көлемінде қалалық және аудандық полиция бөлімдерінің есебінде 80-нен аса жасөспірім тіркелген. Оның ішінде 48-і – мектеп оқушылары, 25-і – колледж студенттері, ал үшеуі – жоғары оқу орындарының студенттері. Бұл көрсеткіштер жасөспірімдер арасындағы алдын алу жұмыстарының әлі де өзектілігін аңғартады.
– 2024–2025 оқу жылында облыстағы 315 мектепте білім алып жатқан 129 833 оқушының 112 мыңнан астамы қосымша біліммен қамтылды. Ал жазғы маусымда 1-10 сынып аралығындағы 121 мыңнан астам оқушының 113 мың 141-ін жазғы демалыспен, сонымен қатар, 35 мың баланы экскурсиялық саяхатпен қамту жоспарда бар, – деді басқарма басшысы.
Алайда бұл бағытта бірқатар түйткілдер де бар. Мәслихат төрағасы Гүлнар Тойлыбаева жазғы лагерьлерге жүргізілген мониторинг барысында анықталған кемшіліктерді атап өтіп, баяндамашыға нақты сұрақтар қойды.
– Текелі қаласындағы жекеменшік «Эдельвейс» лагерінің басшысы биылғы конкурсқа қатыспағанын айтты. Себебі, бір баланың он күндік тамағына бөлінетін 22 мың теңге (күндік – 2200 теңге) бес уақыт тамақтануға жетпейді. Бұл сомамен балаға толыққанды, сапалы тағам беру мүмкін емес екенін жеткізді. Ал «Жетісу» лагерінде жағдай тіптен алаңдатарлық. Екі күн бұрын ашылған лагерь бұрынғы қонақүйдің ғимаратын жалға алып отыр. Балалар жататын бөлмелердің тазалығы сын көтермейді – қабырғаларды өрмекшінің торы басқан. Асханасында күрішке қосылған ет мөлшері 5 балаға ғана жететіндей. Бір аптаға 24 мың теңге бөлінгенімен шын мәнінде тамақтың құнарлылығы да, мөлшері де талапқа сай емес, – деді мәслихат төрағасы.
Бұл ретте басқарма басшысы лагерьлер тиісті рұқсатнама құжаттарын алғандықтан олардың жұмысына заң аясында кедергі келтіру мүмкін еместігін жеткізді. Арнайы арыз-шағым түспесе оларды барып тексеруге құқылары жоғын айтты.
Жиын барысында қаралған екінші мәселе – облыстағы діни ахуал болды. Бұл бағытта облыстық дін істері басқармасының басшысы Сағыныш Жанабай баяндама жасап, өңірдегі діни бірлестіктердің қызметі, миссионерлік жұмыс және рухани білім беру ұйымдарының жай-күйі туралы кеңірек мағлұмат берді. Ол діни тұрақтылықты сақтау бағытында атқарылып жатқан іс-шараларға тоқталып, өңірдегі діни ахуалдың жалпы қалыпты деңгейде екенін мәлімдеді.
Сарби ӘЙТЕНОВА
