Кейінгі кезде газетті ашсақ та, теледидар көрсек те мемлекеттік қызметте жүріп сыбайлас жемқорлыққа жол беріп, бармақ басты, көз қысты жасаған жандардың құрықталғаны жөнінде оқып-көріп жүрміз. Облыстағы жағдай қалыпты болғанымен кей сәтте сондай оқиға орын алып жатады. Облыстық әкімдікте өңірдегі 22 басқарманың өкілдерімен және әкім аппаратындағы бөлім басшыларының қатысуымен семинар-жиналыс өтті.
Басқосуда мемлекеттік қызмет саласында сыбайлас жемқорлыққа қарсы іс-қимыл және оның алдын алу бағытындағы іс-шара жөнінде, адал азамат ұғымына тән құндылықтар туралы, Әдеп кодексінің талаптарын орындау және қызметтік әдеп нормаларын сақтаудың стандарттарынан тұратын үш мәселе қаралды. Баяндамашы ҚР Сыбайлас жемқорлыққа қарсы агенттігінің Жетісу облысындағы департаментінің превенция басқармасының басшысы Асқар Арыстан мемлекеттік қызметте жүріп ақша алып айыппұл арқалап, өз өмірін құртқандар турасында мысал келтіре облыстағы жағдайға тоқталды. Айтуынша, облыста сыбайлас жемқорлық бойынша жағдай тұрақты.
Алайда, кейде әлеуметтік саладағы, яғни білім, спорт мекемесіндегі қызметкерлердің іс-әрекеті көрініп жатады. Мінберде тұрған азамат: «Таңғалғаным, кейде жалақысы 300 мың бола тұра 100 мың теңге алып айыпты болып жатады. Не жетпейді?», – деді. Бүгінде мемлекеттік қызметкерлерге түсіндіру жұмыстары жүргізіліп, сыбайлас жемқорлықтың алдын алу бойынша бірқатар іс жүзеге асып жатыр.
Жиында сөз алғандардың бірі облыстық дін істері басқармасының өкілі, теолог, психолог Қанат Қажымұрат-ұлы адалдық жөнінде, тазалық турасында айтты. Дәл осындай жиын жиі ұйымдастырылып, тиісті жауаптар беріліп отырса талай сыбайлас жемқорлықтың алдын аларына сенімдіміз.
Серік ҚАНТАЙ
