Талдықорғандағы қоқыс өңдеу зауытына арналған жер телімі мемлекетке қайтарылды.
Облыс прокурорлары Талдықорғанда қоқыс өңдеу зауытының құрылысына жер бөлу кезінде бұзушылықты анықтады. Облыстық прокуратураның баспасөз қызметі хабарлағандай, кәсіпкер міндетті сауда-саттықты өткізбестен екі гектардан астам жер телімін алған. Бұл Қазақстан Республикасының Жер кодексіне қайшы келеді.
«Әкімдіктің қаулысы заңсыз деп танылып, құны 3,9 миллион теңге болатын жер учаскесі мемлекет меншігіне қайтарылды», – делінген облыс прокуратурасының хабарламасында.
Сонымен қатар, прокурорлар Алакөл ауданында мақсатына сай пайдаланылмаған жалпы ауданы 1655 гектарды құрайтын 14 жер телімін анықтады. Оларды жалға алу мерзімі аяқталса да жергілікті билік қолда бар өкілеттіктерге қарамастан, ешқандай шара қолданбаған. Бұл мемлекеттiк бюджет үшiн елеулi шығын әрі ауданның тиiмдi дамуына кедергiсін тигізедi.
Учаскелердің жалпы кадастрлық құны шамамен 100 миллион теңгені құрайды. Олардың бәрі мемлекеттік жер қорына қайтарылды. Бұл жерлер өңірдің әлеуметтік-экономикалық дамуына, инвестиция тартуға және жаңа жұмыс орындарын ашуға пайдаланылады.
Жерді мемлекеттік қорға қайтару – жер ресурстарын тиімсіз пайдалануға қарсы күрестегі және жер учаскелерін басқару саласындағы заңдылықты нығайтудағы маңызды қадам. Жетісу облысының прокуратурасы осындай бұзушылықтарды анықтау және кінәлілерді жауапкершілікке тарту бойынша жұмысты жалғастыруға ниетті.
Айгүл БАЙБОСЫНОВА
