Жетісу облысында қызметтік міндеттерін орындау барысында қайғылы оқиға орын алды. Жол-көлік оқиғасы салдарынан екі полиция қызметкері – полиция майоры Арнұр Алханов пен полиция аға лейтенанты Шыңғыс Асылбеков қызмет бабында қаза тапты. Бұл туралы 7-su.kz ақпараттық порталыхабарлайды.
Қайғылы жағдай қоғам мен құқық қорғау органдары үшін ауыр соққы болды. Қазақстан Республикасының Ішкі істер министрі Ержан Сәденов марқұмдардың жақындарына көңіл айтып, олардың есімі әріптестерінің жадында мәңгілікке сақталатынын жеткізді.
“Қызметтік міндеттерін атқару кезінде жол-көлік оқиғасында қаза тапқан полицейлердің туыстары мен жақындарына қайғырып көңіл айтамын. Олардың есімдері әріптестерінің жадында мәңгі сақталады”, – деді министр Ержан Сәденов.
Ішкі істер министрлігінің мәліметінше, марқұмдардың отбасыларына қажетті барлық көмек көрсетілетін болады. Бұл – қызметтік борышын адал атқарған азаматтарға деген құрмет пен жанұяларына көрсетілер қолдаудың көрінісі.
Қоғам тыныштығы мен азаматтардың қауіпсіздігі жолында жанқиярлықпен қызмет еткен полицейлердің жарқын бейнесі ел жадында сақталмақ.
