Экологиялық мәселелерге арналған бейнероликтер байқауы өтті. Ауқымды шара облыстың барлық ауданы мен қаласында бір мезгілде ұйымдастырылды. Оған жастар ұйымдары мен білім беру мекемелерінің белсенділері қатысты.
Жастардың экологиялық сауаттылығын арттыру, табиғатқа деген жауапкершілікті терең сезіндіру және экологиялық мәселелерге шығармашылық көзқарас қалыптастыру мақсатында өткен байқауға 11 команда қатысты.
Байқау «Менің эко-күнім», «Табиғат тіл қатады», «Қоқыстан кейінгі өмір» атты үш бағыт бойынша жүргізілді. Қатысушылар экологиялық ойларын қысқаметражды бейнеформатта жеткізіп, әлеуметтік желілерге бейімделген, заманауи және креативті жұмыстарды ұсынды.
Жас авторлар бейнероликтерінде табиғатты қорғау, қалдықтарды қайта өңдеу, экологиялық мәдениет қалыптастыру сияқты өзекті тақырыптарды көтеріп, бейнебаяндарын тың идеялармен толықтырды. Байқау барысында ұсынылған жұмыстар сценарий сапасы, тақырыпты ашу деңгейі, шығармашылық көзқарас және техникалық орындалу тұрғысынан бағаланды.
Байқауда І орынды Ескелді ауданының командасы иеленді. Ал ІІ орынды Текелі қаласының қатысушылары алса, ІІІ орынды Сарқан ауданының өкілдері еншіледі. Үздіктер қатарынан көрінген командаларға Алғыс хат пен естелік сыйлықтар табыс етілді.
Бұл байқау Жетісу жастарының табиғатты аялауға деген белсенді көзқарасын байқатты. Мұндай бастамалар өңірде экологиялық мәдениеттің дамуына және қоршаған ортаны қорғауға бағытталған қоғамдық белсенділіктің артуына ықпал ететіні сөзсіз.
Е. БАУЫРЖАНҚЫЗЫ
