Алдымен облыс орталығындағы Өтенай ауылы, 3-ші бөлімше, «Шығыс» және «Көктал» тұрғын үй алабындағы жол сапасын тексеріп шыққан қала әкімі одан әрі орташа жөндеу жұмыстары жүргізіліп жатқан Гагарин, Рүстембеков және Жансүгіров көшелеріне ат басын бұрды. Аталған аумақтардағы қолға алынған әр жол құрылысына баса назар аударған ол көзге түскен кемшіліктерді атап көрсетіп, жауапты мердігер мекеме басшыларына сын ескертпелер жасады. Әрі оларға жолдың сапалы болуын қатаң бақылауда ұстап, мерзімінде аяқтауды тапсырды.
– Жол инфрақұрылымын жақсарту – қала әкімдігінің жоспарындағы басым бағыттарының бірі. Қала тұрғындарының жайлылығы мен қауіпсіздігі – жол сапасына тікелей байланысты. Осыған сай әрбір нысан бойынша жұмыс сапасы мен кестеге сәйкестігі тұрақты бақылауда болады. Сондықтан қолға алынған іске үлкен жауапкершілікпен қарау қажет. Қала аумағындағы жол құрылысы тек осымен ғана шектелмейді, бұдан былай да жалғасады»,– деді Ернат Дүйсенбекұлы.
Мамандардың мәліметінше, өткен жылы Талдықорған қаласы бойынша 54 шақырымға жуық жолға жөндеу жұмыстары жүргізілсе, биыл облыс орталығындағы 70-ке жуық жол ретке келтіріліп, жалпы 17450 шаршы метр көшеге ағымды жөндеу жүргізілмек. Мұнда шаһардағы Құлагер, Бірлік шағын ауданына, Жастар-1 және Солтүстік-Батыс тұрғын үй алабына 53,9 шақырым болатын жаңа жол салынбақ. Осылайша аймақтағы жаңадан бой түзеп келе жатқан аудандарда 107 көше жаңармақ. Сонымен бірге, 21 шақырымнан астам жол күрделі жөндеуден өткізіліп, жол жамылғысын ауыстыру бойынша 27,9 шақырым ұзындықтағы 28 көшеге орташа жөндеу жұмыстарын жүргізу жоспарланған.
Айдын КӘЛІМХАН
