Спартакиаданың өтуіне бастамашы болып, қолдау көрсеткен – облыстық дене шынықтыру және спорт басқармасы. Сайыстың басы-қасында жүріп, қадағалап, Әр сәтті назардан таса қалдырмады. «Спортты дамыту және бұқаралық-спорттық іс-шараларды өткізу дирекциясының» басшысы Рүстем Қалиев: «Бастамасы жүзеге асқандықтан бұл спартакиада міндетті түрде жалғасын табу қажет. Қандайда бір іс-шара өткізсек, алғашқы болып ақпараттық қолдау көрсететін жандардың да мереке қарсаңында бой сергітіп, ой жазуына тамаша мүмкіндік сыйлағымыз келді», – дейді.
Алғашқы күні футболдан болған жарыста «Jetіsý» газетінің командасы, ал волейболдан «Жетісу» телеарнасының құрамасы жеңіске жетті. Одан кейін жекелей спорт түрлерінде бәсекелестік күшейе түсті. Үстел теннисінде «Жетісу» футзал клубының видеоператоры Алмас Мырзахметов қарсыластарынан әбжіл қимылдаса, қыздар арасында «Жетісу» радиосының қызметкері Айдана Хасенге қарсылас табылмады. Шахматтан «Вестник Жетісу» газетінің дизайнері Медет Бердешев және қыздар арасында «Талдықорған» газетінен қатысқан Сәуле Мүскенова жеңімпаз болды. Ал дойбыдан «Jetіsý» газетінің қызметкері Нүсіпбай Әбдірахым әр тасты өз пайдасына шеше отырып, барлық қарсыласынан үстем түсті. Тоғызқұмалақтан қыздар арасында «Jetіsý» газетінің жауапты хатшысы Еңлік Кенебайға тең келер ойыншы болмады.
Басқа сайыстармен салыстырғанда қатысушылар саны көп, ойын уақыты да ұзаққа созылған бильярд болды. Еркін пирамида (америкалық) үлгісімен шар соққандар ішінен «Жетісу» арнасының бағдарламалар бөлімінде жұмыс істейтін Жайдар Байтақ чемпион болса, «Jetіsý» газеті бас редакторының орынбасары Мәди Алжанбай екінші орынды алды. Үштікті «Вестник Жетісу» газетінің жауапты хатшысы Асхат Алтынбеков пен «Жетісу» арнасының журналисі Шалқар Нұрмұхамбет түйіндеді.
Әр спорттан оқ бойы озық шыққандар тізіміне еніп, футболдан үшінші орынды, волейболдан жеңімпаз командада болып, дойбыдан үшінші орын, үстел теннисінен екінші орын алып, бильярдта жартылай финалдан сүрінген «Жетісу» радиосының редакторы Аршын Айбынбекұлы: «Бұл спартакиада эмоцияға толы, достық рәуіште өткен мереке болды. Биыл жеңіске жетуге сәл қалғандар үлкен дайындықпен келесі спартакиаданы тағатсыздана күтеді деп ойлаймын. Ұмытылмас естеліктер сыйлады, – дейді.
Қалам мен камераны серік етіп, техниканы меңгеріп, сөз бен сөйлемнің қадірін түсінетін шеберлердің спорттық алаңдағы ширақ қимылдарын көрген көзді сүйсінтеді. Олардың әрекеттері тап бір кәсіби спортшыдай әсер қалдырды. Бастауын алған спартакиада келер жылы да жалғаспақ.
Серік ҚАНТАЙ
