Оқу-ағарту министрлігі 2026 жылы педагогтердің жалақысын көтеру мүмкіндігіне қатысты пікір білдірді. Ведомство мәліметінше, Мемлекет басшысының Қазақстан халқына Жолдауларында берген тапсырмалары аясында соңғы жылдары мұғалімдердің жалақысы айтарлықтай өсті, – деп хабарлайды 7-su.kz ақпараттық порталы El.kz сайтына сілтеме жасап.
2020 жылғы 1 қаңтардан бастап мемлекеттік білім беру ұйымдарының педагогтерінің айлықтары төрт жыл бойы жыл сайын 25%-ға артып отырды. Сонымен қатар 2023 жылғы 1 қыркүйектен бастап мектепке дейінгі ұйымдардың тәрбиешілері мен педагогтерінің айлығы Мемлекет басшысының 2022 жылғы 1 қыркүйектегі тапсырмасына сәйкес 30%-ға артты, – деп жауап берді министрлік BAQ.KZ-тің ресми сұрауына.
Министрліктің дерегінше, 2023 жылы педагогтердің жалпы жалақысы 2019 жылмен салыстырғанда 100%-ға көбейген, ал мектепке дейінгі тәрбиешілердің еңбекақысы 130%-ға өскен.
Мұғалімнің жалақысы оның біліміне, категориясына, еңбек өтіліне, жүктеме көлеміне, сондай-ақ өтемақы және ынталандыру төлемдеріне байланысты. 2025 жылы мұғалімнің бір ставка бойынша орташа айлық жалақысы 393 мың теңгені құрайды, – деп толықтырды Оқу-ағарту министрлігі.
Министрлік сондай-ақ азаматтық қызметшілердің еңбекақы төлеу жүйесіне сәйкес квалификациялық санат үшін қосымша төлемдер қарастырылғанын еске салды:
«педагог-мастер» – лауазымдық айлықтың 50%-ы,
«педагог-зерттеуші» – 40%,
«педагог-сарапшы» – 35%,
«педагог-модератор» – 30%.
Қазақстан Республикасының Бюджет кодексінің 73-бабына сәйкес, мемлекеттік бюджеттен шығындардың артуын көздейтін нормативтік құқықтық актілердің жобалары міндетті түрде Республикалық бюджеттік комиссияда қаралуы тиіс, – делінген министрлік түсіндірмесінде.
Бұл дегеніміз, 2026 жылы мұғалімдердің жалақысын көтеру мәселесі тек Бюджеттік комиссия қарап, мақұлдағаннан кейін ғана шешімін табады деген сөз.
