Қазақстан аумағында алдағы күндері ауа райы күрт өзгеріп, қатты суықтардың болатыны туралы Төтенше жағдайлар министрлігі 8 желтоқсанда ресми хабарлама таратты, – деп жазады 7-su.kz ақпараттық порталы.
Синоптиктердің дерегінше, республиканың басым бөлігінде ауа температурасы айтарлықтай төмендеп, қатты аяз, көктайғақ, боран және тұман күтіледі. Желдің екпіні күшейіп, жолдарда көріну деңгейі нашарлауы мүмкін.
Ең төмен температура –20…–33 °C аралығында болып, төмендегі өңірлерде тіркеледі:
Ақтөбе, Қостанай, Солтүстік Қазақстан, Ақмола, Павлодар, Қарағанды, Шығыс Қазақстан, Алматы, Ұлытау, Абай және Жетісу облыстары.
Қар жауып, боран соғатын аймақтар:
Солтүстік Қазақстан, Ақмола, Павлодар, Қарағанды, Шығыс Қазақстан, Жамбыл, Түркістан және Алматы облыстары.
Көктайғақ күтілетін өңірлер:
Алматы, Түркістан, Жамбыл, Шығыс Қазақстан, Ақтөбе, Батыс Қазақстан және Қызылорда облыстары.
Министрлік азаматтарға алыс жолға шықпауға, көлік жүргізуде аса мұқият болуға, жылы киінуге және ауа райы болжамдарын тұрақты түрде бақылап отыруға кеңес береді.
«ТЖМ қауіпсіздік шараларын сақтауды, қажетті болмайынша ұзақ сапарға шықпауды және ауа райының өзгерістеріне назар аударуды ескертеді», – делінген ресми хабарламада.
