Биылғы жыл еліміз үшін саяси оқиғаларға толы болды. Қыркүйектің 1-і күні «Әділетті мемлекет. Біртұтас ұлт. Берекелі қоғам» атты Жолдауында көпке ұзамай кезектен тыс Президент сайлауын өткізуді ұсыныс ретінде ортаға салған Мемлекет басшысы Қасым-Жомарт Тоқаев үміткерлердің арасынан озық шықты. Онымен бірге сайлауға түсіп, халыққа өз бағдарламасын ұсынған кандидаттардың осалы жоқ. Бәрі де халықтың, мемлекеттің дамуына үлес қосуды көздеді.
Үгіт-насихат кезеңінде күллі Қазақстанды аралап, сайлаушылармен түрлі форматтағы кездесулер өткізіп, сайлауалды тұғырнамасын таныстырған үміткерлердің бастамасы аяқсыз қалмауы тиіс деп білемін. Себебі, қаншама адамның көкірегіне үміт отын жаққан Жигули Дайрабаев, Қарақат Әбден, Нұрлан Әуесбаев, Мейрам Қажыкен, Салтанат Тұрсынбекова телеарнаның тікелей эфирінде өткен телесайыс арқылы ел мен жердің өркендеуіне қажетті тың бағыттарды ұсынып, көпшіліктің көкейінде жүрген өзекті мәселелерді қозғады. Атап айтқанда, қазіргідей ғылыми технология өркендеген тұста өскелең ұрпақты ұлттық бағытта тәрбиелеудің маңыздылығы, мектеп оқушыларына қолдау көрсетудің және дұрыс бағытта оқытудың қажеттігі, ауылшаруашылығы саласын дамытудың кезек күттірмейтін мәселе екені, сыбайлас жемқорлықты түп-тамырымен жоюдың мемлекеттің қарқынды дамуына тигізер әсері, халқымыздың қастерлі салт-дәстүр мен әдет-ғұрпы аяқсыз қалмауы, шетелден келіп жатқан дүниетаным мен азғындықтың ұлтымызға жат екені, адам құқығының қорғалуы, ішімдікқұмарлық, нашақорлық сынды жағымсыз әдеттердің зиянынан арылу керегі, мемлекеттік басқару жүйесіндегі жаңашыл реформалардың жүзеге асуы көпшіліктің көңілін елеңдеткені анық. Сол себепті негізі берік, қуаты ерекше, тиімділігі орасан бағдарламаларды күн тәртібіне қою кезек күттірмейтін тақырыптар қатарын толықтырды. Осыған орай биылғы кезектен тыс Президент сайлауына қатысып, сайлаушылардың сеніміне ие болған кандидаттарды халық биліктің қатарынан көргісі келеді.
Әрине, олардың бәрі де жұмыссыз жүрген адам емес. Әрқайсысының атқаратын қызметі, табысты кәсібі бар. Дегенмен, еліміздің саяси кеңістігінде өз үнін айтқан адамдардың мүмкіндігін көрсетуіне жол ашу керек-ақ. Сонда ғана еліміздегі демократиялық қадам толығымен жүзеге асады.
Қасым-Жомарт Тоқаевтың сайлау штабының мүшесі бола жүріп, Жетісу жеріндегі көптеген ұжыммен кездесу өткіздік. Солардың бәрінде халықтың саяси көзқарасы қалыптасып, еліміздің ертеңі мен болашағына алаңдайтынын байқадық. Тіпті, кейбір саясаттанушылардың өзін жаңылдыратындай сауал қойылды. Шама-шарқымыз жеткенінше артығымен жауап беріп, мәселенің дұрыс жағын, тақырыптың ашық тұсын көрсеттік. Міне, осының өзі сайлаушылардың деңгейінен хабар беріп, шалғайда жатқан қарапайым тұрғынның терең парасат-пайымын байқатты. Сол себепті, қазіргі жұртшылықтың талап-тілегі биік, арман-мұраты асыл, мақсат-межесі асқақ тұрғаны білінді. Әсіресе, жастардың көзінде жалынды жігер, көкіректерінде жанашыр ықылас-пейіл, шынайы тілек ұшқындап тұрды. Ондай шуақтың кеңінен таралуы өскелең ұрпақты түгел қамтитынына сенім мол.
Ендеше, келешекті даналыққа, әділдікке, адалдыққа бастайтын жастарға бүгін дұрыс тәрбие беру керек! Шынында жас шыбыққа түзу тұғыр орнатса биік бәйтерек өсетіні белгілі. Сол секілді әрбір өскелең жасты елдің өркендеуіне үлес қосатындай тәрбиелеу – бүгінгі күннің аса өзекті мәселесі.
Өз басым облыстық мәслихаттың депуттарымен жүздескен сайын осы бағытта жұмыс істеу керегін ескертіп отырамын. Президентіміз биылғы Жолдауында: «Ата-аналар мен оқушылар алған білімнің және игерген машық-дағдысының сапалы және сұранысқа ие болуы үшін белгілі бір деңгейде жауапты екенін сезінуге тиіс. Сондықтан олармен де үнемі әріптестік қатынас орната білу керек», – деп мәселені тереңнен шешуді ұғындырып, баршамызға үлкен жауапкершілік жүктеді. Шынында ұрпағының оқып, білім алуын көздеген жандардың жұлдызы биік, келешегі жарқын. Өйткені, белгілі бір мамандықты меңгеріп шыққан жанның отбасына, әке-шешесіне, бауырларына көмекші болатыны белгілі. Сол арқылы әрбір отбасының табысы артып, түсімі молаяды.
Гүлнар Тойлыбаева,
Жетісу облыстық
мәслихатының хатшысы
