Жазғы демалыс – балалар үшін әсерлі шақ. Әбден демалып, күнге қыздырынып, суға түсіп, туған-туысқа сапарлайды. Алайда дәл осы уақытта жазатайым оқиғалар күрт өседі. Көбінесе ересектердің бақылауынсыз қалған және қауіпсіздік ережелерін сақтамаған балаларды әртүрлі қауіп-қатерден сақтау – қоғамның міндеті. Облыстық денсаулық сақтау басқармасы басшысының орынбасары Жанета Нұрманбетова мен педиатр дәрігерлер жазғы демалыста балалардың қауіпсіздігін сақтауға қатысты баспасөз мәслихатын өткізді.
Жанета Нариманқызының айтуынша, жаз мезгілінде суға батып кету, жол-көлік оқиғаларына тап болу, велосипед, самокат, роликпен жол ережесін сақтамау, күн өту, жәндіктердің шағуы, улану, от пен электр тогынан жарақат алу жағдайлары жиі орын алады. Осындай жазатайым оқиғалардың алдын алу үшін суға рұқсат етілген жерлерге ғана ересектердің бақылауымен шомылу керек. Соған орай терең жерге бармауды, қауіпті аймақтан секірмеуді, үрмелі құрылғылармен алыстап кетпеуді балаларға үнемі айтып отырған дұрыс. Әсіресе, суда жүзуге үйрету – маңызды. Одан бөлек, балаларға жол жүру ережесін жүйелі түрде түсіндіріп отыру керек.
Сондай-ақ, жаяу жүргінші өткелін пайдалану, бағдаршамға бағыну, велосипедпен жүргенде шлем, тізеқап сияқты қорғаныш құралдарын киюді үйренуі тиіс.
Талдықорған қалалық №1 емханасының педиатры Ләззат Арғынова тұрмыстық қауіпсіздік шараларын сақтамаудың салдарынан да оқыс оқиғалардың орын алып жататынын айтып, электр құралдарын тек ересектердің рұқсатымен қолдану, газ, сіріңке, оттық сияқты қауіпті заттарды кішкентай балаларға ұстауға тыйым салу, өрт қауіпсіздігі ережелерін түсіндіру басты назарда тұруы керектігін ескертті. Лагерь, саяхат немесе экскурсия алдында балалармен нұсқаулық жүргізіп, алғашқы көмек көрсету жолдарын үйреткен дұрыс.
Ана мен бала денсаулығын сақтау, мүмкіндігі шектеулі балаларды қолдау, вакциналау, скрининг тексерулерінен өткізу және саламатты өмір салтын насихаттау бойынша медицина саласында жүйелі жұмыстар жүргізіліп жатқанын айтқан Ескелді аудандық орталық ауруханасының педиатр дәрігері Жалын Ержанқызы балалардың бос уақытын тиімді өткізу, кіммен жүргенін, қайда барғанын ата-аналар үнемі қадағалап отырса деген тілегі барлығын жеткізді.
Жаз – балалар үшін жарқын естеліктерге толы кезең. Алайда қауіпсіздік шаралары сақталғанда ғана нағыз демалыс болады. Ересектер балалардың амандығы үшін жауапты. Сондықтан қауіптің алдын алу – ата-аналар үшін бұлжымас ұстаным.
Гүлжан ТҰРСЫН
