Екінші дүниежүзілік соғыста КСРО-ның миллиондаған азаматтарының қатарында қауіпсіздік органдарының қызметкерлері де абыроймен соғысып, ел мен жерді қорғауға атсалысты. Солардың ішінде 1924 жылы Қостанай облысының Меңдіқара ауданындағы Ораз ауылында дүниеге келген Жұмабай Қорғанбекұлы Бержанов та бар еді.
Майданға 18 жасында аттанған кейіпкеріміз 1942 жылы Орал әскери округінің №22-ші атқыштар полкіне курсант ретінде қабылданады. Содан бір жылдан соң, яғни, 1943 жылдан бастап соғыс аяқталғанға дейін 2-ші Украина майданында 105-атқыштар дивизиясына қарасты 349-шы гвардиялық полкінің құрамында бөлімше командирі болып қызмет ете жүріп, қанқұйлы соғысқа қатысады. Күннен-күнге күш алған Кеңес әскерінің қатарында Австрия, Венгрия және Чехословакия елдерін фашизм басқыншылығынан азат етуге қатысып, соғыстың аяқталуына үлес қосады.
Соғыс шығынсыз болмайды. Кескілескен ұрыста ауыр жараланған Жұмабай Қорғанбекұлы қаншама қаруласынан айырылады. Майдандағы ерлігі еленген ол Қызыл Жұлдыз ордені, «Ерлігі үшін» медалі секілді көптеген әскери және үкіметтік наградалармен марапатталады. Қаруластарының арасында білікті бөлімше командирі, батыл да тәуекелшіл жауынгер, сенімді жолдас және тәртіпті, жауапкершілігі жоғары офицер ретінде танылды.
Соғыстан кейін Жұмабай Бержанов туған жеріне оралып, 1950 жылға дейін Меңдіғара ауданының «Бірлестік» кеңшарында қатардағы жұмыскер және Тобыл ауылдық кеңесінің хатшысы болып адал еңбек етті. Соғыстан кейінгі ауыр күндерде тынбай еңбектенген ардагер қоғам артқан барлық қызметті жауапкершілікпен атқарып, көпшіліктің ықыласына бөленді.
Майдан көрген барлық ардагерлер секілді тыныштықтың құнын жоғары бағалаған Бержанов өндіріс жетекшісіне айналды. Осылайша халық шаруашылығының қалпына келуі мен дамуына үлес қосқаны үшін басшылық тарапынан бірнеше рет марапатталып, бағалы сыйлықтарға ие болды.
Жекебасының қасиеттері мен іскерлік қабілеті, майданда шыңдалған мінез-құлқы жоғары бағаланған Жұмабай Қорғанбекұлы 1950 жылы КСРО Мемлекеттік қауіпсіздік комитетіне жұмысқа шақырылады. Осы органның арнайы курсынан өткен соң Түркіменстан КСР-нің Красноводск және Ашхабад облыстарында жедел уәкілдік қызмет атқарды. 1958-ші жылдан 1970-ші жылға дейін Қазақ КСР-нің Қостанай облыстық МҚК басқармасында еңбек етті. 1973 жылы Алматы облысы Кеген аудандық ҰҚК бөлімінің басшылығына келген кейіпкеріміз 1976 жылы Талдықорған облыстық ҰҚК басқармасына алынып, толысқа шыққан 1983 жылдың мамырына дейін түрлі уәкілдік және басшылық лауазымдарда қызмет етті.
Аталған қызметтердің бәрінде өзін тек жақсы жағынан көрсеткен Жұмабай Бержанов бірнеше рет үкіметтік, ведомстволық және мерекелік медальдармен, Грамоталармен, Алғыс хаттармен марапатталды. Бірге қызмет еткендердің құрметі мен ықыласына бөленген әріптесіміздің жарқын бейнесі жүрегімізде мәңгі сақталады.
ҰҚК облыстық
департаментінің
ардагерлер кеңесі
