Бүгін аталған іске төрағалық етуші судья Әбинұр Қарабаевтың журналист Ботагөз Омароваға тілін шығарған видеосы отандық БАҚ пен әлеуметтік желілерде кеңінен тарап кетті, деп хабарлайды 7-su.kz ақпараттық порталы inbusiness.kz сайтына сілтеме жасап.
Мұндайды кәсіби мансабында алғаш рет көрген журналист әлеуметтік желідегі парақшасында оқиға барысын баяндап берді.
– Журналист болғалы көп нәрсе көрдім. Бірақ, судьяның тіл шығарғанына бірінші рет тап болдым. Шымкент әкімінің орынбасары Руслан Берденовке қастандық жасаған адамның сотында төрағалық етіп отырған судья Әбинұр Қарабаев қараптан-қарап маған тілін шығарды. Шынымды айтсам, мұны түсінбей, абдырап қалдым. Қарабаевқа не болды? Ол бұл әрекетімен не айтқысы келді? Жағдайы дұрыс па өзі, алаңдап отырмын, – деп жазды журналист Ботагөз Омарова.
Кейіннен белгілі болғандай, Әбинұр Қарабаевқа қатысты тергеу тағайындалмақ. Яғни, судьяның тәртібі жан-жақты тексеріліп, майшаммен қаралады.
– Шымкент қаласы әкімінің орынбасарын өлтіруге оқталу туралы қылмыстық істі қарау кезінде төрағалық етуші судья Әбинұр Қарабаевтың әрекеті Судья әдебі кодексін бұзғаны үшін тергеліп жатыр, – деп мәлімдеді Шымкент сотының баспасөз қызметі.
Сондай-ақ, судьяның беделін түсіретін құқықбұзушылық жасау фактісі расталса, материалдар Жоғарғы Сот кеңесі жанындағы сот жюриіне жіберілетіні де ескертілген.
