Қазақстан атом энергетикасы саласындағы мамандарды даярлауды күшейтуді көздейтін жаңа бастаманы қолға алды, деп хабарлайды Aikyn.kz. Тараптар атом электр станциясын салу және пайдалану үшін кадрлық қамтамасыз етудің стратегиялық маңызын ескере отырып, «Болашақ» халықаралық стипендиясы бағдарламасына атом энергетикасы саласы бойынша жеке бағыттарды енгізу туралы келісімге келді.
Меморандумға Ғылым және жоғары білім министрі С.Нұрбек, Атом энергиясы агенттігінің төрағасы А.Сәтқалиев, «Халықаралық бағдарламалар орталығы» АҚ Басқарма төрағасы Ә.Кусманов және «Қазақстан атом электр станциялары» ЖШС Бас директоры Е.Бердигулов қатысты.
Келісім инженерлік, техникалық және ғылыми бағыттар бойынша мамандарды тартуға жол ашып, Қазақстандағы атом энергетикасының өсуіне негіз болатын кадрлық әлеуетті нығайтады. 2026 жылы «Болашақ» бағдарламасы аясында пилоттық түрде 20 грант бөліну жоспарланған, алдағы уақытта бұл гранттар жыл сайын ұсынылады.
Бағдарлама шетелдің жетекші жоғары оқу орындарында халықаралық тағылымдамаларды, магистрлік және докторанттық білім беру бағдарламаларын қамтиды. Стипендиаттарды әлеуетті жұмыс берушілермен өзара ынтымақтастық арқылы жұмысқа орналастыру үшін үшжақты келісімшарттар қарастырылған.
Қазіргі уақытта Pennsylvania State University, Grenoble INP – UGA, Shanghai Jiao Tong University, City University of Hong Kong және «МИФИ» Ұлттық зерттеу ядролық университеті сияқты жетекші шетелдік оқу орындарымен ынтымақтастықты пысықтау жұмыстары жүргізілуде.
«Болашақ» бағдарламасы аясында атом саласына мамандар даярлаудың жеке бағытын енгізу инженерлер, технологтар, операторлар және басқа да кәсіби кадрлар пулын қалыптастыруға мүмкіндік береді.
