Сырттан Ынтықбаев өзінің әскери борышын елде жалғастырды. Аудандық ішкі істер бөліміне милиционер болып орналасты. 1944-1954 жылдар аралығында Жаркент қаласында, Қарабұлақ кентінде, Арасан, Ақсу ауылдарында учаскелік милиционер қызметін атқарды. 1946 жылы ұстаз Меруерт Болысбекқызымен отау құрды.
Соғыc ардагері Сырттан Ынтықбаев 1958 жылы Мұзбұлақ жайлауында өткен Шопандар тойына бас-көз болды. Барша жауапкершілікті өзіне алып, бастан-аяқ тәртіп күзетінде жүрді. Шопандар слеті аяқталған шақта, 1958 жылы 10 маусымда миына қан кетіп, кенеттен қайтыс болды. Облыс, аудан активтері марқұмды Қапал кентінің батыс бөлігіндегі тау бөктеріне жерлеуді ұйғарды. Зираты темір шарбақпен қоршалып, ескерткіш белгі қойылды.
«Орнында бар оңалар» деп жатады ғой қазекем. Ардагер отбасынан өмірге келген ұл-қыздарының өзі бүгінде немере-шөберелі болды. Солардың қатарында Сәуле, Зәуре, Сұлтан, Раушан, Айдос, Тоты деп аталатын шаңырақ иелері бар. Тек қана Сұлтан мен Раушан ертерек қайтыс болған. Екеуінен 3 қыз, 2 ұл өмірге келген. Аман-сау ержетуде.
Кенжехан Рақыш
ардагер журналист
