Премьер-министр Олжас Бектеновтің төрағалығымен Цифрлық штабтың отырысы өтті. Жиында Мемлекет басшысы Қасым-Жомарт Тоқаевтың «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауында белгіленген міндеттер талқыланды. Премьер-министрдің айтуынша, жасанды интеллектіні енгізу нақты нәтижеге бағытталуы тиіс.
Отырыс қорытындысында бірыңғай ұлттық цифрлық жүйе құруға арналған бірқатар шешім қабылданды. Мемлекеттік органдарға мынадай тапсырмалар жүктелді:
-
15 қарашаға дейін денсаулық сақтау саласының басым бағыттарына отандық стартаптардың шешімдерін енгізу үшін НҚА-ға өзгерістер енгізу;
-
20 желтоқсанға дейін денсаулық сақтау саласындағы 7 ақпараттық жүйені Qaztech базасындағы 2 интеграцияланған платформаға біріктіру;
-
1 желтоқсаннан бастап электр және жылу желілерін диагностикалауға жасанды интеллектіні пайдалану;
-
20 желтоқсанға дейін энергетика саласында Салалық ақпараттық қауіпсіздік орталығының жұмысын қамтамасыз ету.
Денсаулық сақтау саласында ЖИ-ассистенттерді енгізу, онкологиялық және басқа ауруларды ерте анықтау жүйелерін іске қосу жоспарланып отыр. Жыл соңына дейін 7 ақпараттық жүйе біріктіріліп, саладағы барлық 30 жүйені қамту көзделген. Бұл медицина қызметкерлерінің жұмысын жеңілдетеді және қайталанатын жүйелерді қысқартады.
Энергетика саласында жасанды интеллект пен дрондарды пайдалану желілерді қысқа мерзімде тексеріп, ақауларды дәл анықтауға мүмкіндік береді. Құбырларды ішкі жағынан бақылауға арналған датчиктер орнатылған арнайы құрылғылар қолданылады. Бұл инфрақұрылымның жағдайын жедел бағалап, жөндеу жұмыстарын жоспарлауды жеңілдетеді.
Сонымен қатар, Салалық ақпараттық қауіпсіздік орталығы энергетикалық жүйелердің киберқауіпсіздігін күшейтіп, сала нысандарына жаңа талаптар әзірлейді.
