Текелі – тау қойнауында орналасқан, тұмса табиғатымен тамсандыратын, қысы-жазы меймандары мен алыс-жақын шетелдерден қонағы үзілмейтін, туризмі мен өнеркәсібі ерекше дамыған, емдік-шипалық мекемелерімен де танымал жер жаннаты Жетісудың шұрайлы жерінің бірі.
Еліміздің түкпір-түкпірінен ағылып келетін демалыс орнының біре-гейі – «Текелі» шипажайы. Дертке дауа болған демалыс орны Қазақстанның ең танымал шипажайларының қатарына кіреді. 1976 жылдан жұмыс істеп келеді. Бұл жерде көптеген сырқаттан емделу үшін соңғы үлгідегі заманауи және ең тиімді ем-дом әдістерін ұсынады. Шипажайда күніне орта есеппен 80 адам қабылдайды. Жолдама бойынша мұнда жылына 1500-ге жуық адам қаралады.
«Текелі» шипажайы денсаулықты нығайтудың 1 дәрежелі мекемесі болып саналады, демалушы ата-аналарды барлық жас мөлшеріндегі балаларымен қабылдауға мүмкіндік беретін мемлекеттік лицензиясы бар. Диагностикалық-емдеу базасы көптеген аурудың алдын алу мен оны емдеуге қажетті құрылғылармен жабдықталған. Тәжірибелі мамандар тиімді заманауи технологияларды қолдана отырып, ағзаның жалпы жағдайын қарап, ауруды анықтайды. Әр саланың маман дәрігерлері – терапевт, уролог, кардиолог, невропатолог, гинеколог кеңес береді. Демалушыларға барлық жағдай жасалған.
– Бізге көбіне мемлекеттік жолдама арқылы тегін ем алуға мүмкіндігі шектеулі жандар келеді. Бұрын олар 12 күн қаралатын, қазір екі аптаға ұзарттық. Шипажайда жаз айларында мүлдем орын болмайды. Себебі, ем алушылар қыстың соңғы айынан бастап тапсырыс береді. Келушілер таңнан кешке дейін рет-ретімен диагнозына қарай ем алады,– дейді «Текелі» шипажайының директоры Виктор Никифоров.
Мұнда негізінен тірек-қимыл қозғалыстары зақымдалған жандарды емдейді екен. Шипажайда Алакөл балшығы, ванна флоатинг, бронхит, пневмония, ЛОР-патологиясына өте пайдалы «тұзды шахта» сынды көптеген сауықтыру кабинеттері бар. Сондай-ақ, мүмкіндігі шектеулі жандарға арналған арнайы бөлмелер де қарастырылған. – 185 градуста суықпен емдейтін заманауи технологиялар да бар. Аппараттың көбі Ресей және Гонконгтан келеді. Мәселен коронавирус індеті өршіп тұрған соң былтыр Ресейден қан айналымын тазартатын заманауи аппарат алыпты. Соның арқасында қаншама адам сауығып шыққан.
Ең кереметі, шипажайға келерде ауызсу сатып алудың керегі жоқ. Мұнда қарапайым краннан ағып тұрған судың өзі тұмадан келеді. Қараламын деушілерге бағасы да арзан. 1 күндік жолдама 11 мың теңге.
Айдар ҚАЛИЕВ,
Жетісу облысы
