Спикердің айтуынша, ұлағатты шара аясында Кеңес Одағының Батыры, Халық Қаһарманы, армия генералы, ҚР тұңғыш Қорғаныс министрі Сағадат Нұрмағанбетовтің есімі көше атауына беріледі. Облыс әкімі Бейбіт Исабаев қатысатын салтанатты шарада батырдың ұрпақтары көшенің лентасын қияды. Соңынан «Талдықорған әуендері» ансамблінің концерттік бағдарламасы қойылады.
7-мамыр күні Қазақстан Республикасы Қарулы күштерінің құрылған күніне арналған «Ел намысын – ер қорғайды, ер ерлігін – ел қолдайды» атты әскери шеру өтеді. Облыс орталығында 9-мамырда кең көлемде тойланатын шара – «Ер есімі – Ел есінде» деп аталады. Бұл игілікті іс әскерге шақырылған 30 сарбазды шығарып салу рәсіміне ұласады. Сондай-ақ, орталық алаңдағы лед экраннан Астанада өткен шеру тікелей эфирде көрсетіледі. Мереке күндері бұдан басқа да шаралар жалғасын табады.
Қала әкімінің орынбасары Жеңіс Саятбекұлы қала тұрғындарын мерекелік іс-шараларға белсенділікпен қатысуға шақырды. Елдің рухын көтеретін игілікті істің мән-мағынасы жоғары деңгейде болуы үшін барлық жауапты мекемелер күш салуда.
Гүлжан ТҰРСЫН
