Бейсен Құранбек атындағы Журналистер үйінде облыстық көпсалалы клиниканың директоры Мадияр Өмірбаев брифингке қатысып, журналистерге обыр дерті жайлы мәлімет берді. Облыс бойынша қатерлі ісікпен 7432 науқас диспансерлік есепте тұр. Қатерлі ісік құрылымында сүт безі қатерлі ісігі 13,7%, колоректальды обыр 9,2%, өкпе және бронх қатерлі ісігі 7,9%-ды құрайды. Аймақта қатерлі ісік салдарынан болған өлім-жітім 51,2%.
Мадияр Өмірбаев: «Тікішек және колоректальды обыр бойынша 514 пациент есепте тұр. Олардың 239-ы 5 жылдан астам бақылауда. Бұл жалпы сырқатпен тіркелгендердің 46,5%-ын құрайды. Кезең бойынша: 1-сатымен 174 пациент, 2-сатымен 257, 3-сатымен 61, 4-сатымен 22 адам ем қабылдауда. Биыл 1-тоқсанда 33 адам диспансерлік есепке алынды. Колоректальды обырды ерте анықтау мақсатында скринингтік бағдарламалар жүргізілуде. Скринингтік бағдарлама бойынша диспансерлік есепке 29 пациент тіркелді. Клиника қабырғасында тоқішек және тікішек қатерлі ісіктерін анықтауда скринингтен бөлек, күрделі диагностикалық шаралар атқарылуда»,– деді. Мадияр Аманкелдіұлының айтуынша, клиникада видеоколоноскопия, компьютерлік томография, эндоскопиялық биопсия, гистология және цитология, рентгендиагностика, зерттеулер толық атқарылады.
Қазіргі таңда клиникада колоректальды қатерлі ісікті емдеуде арнайы ем шаралары қолданылуда. Клиникада жасалып жатқан күрделі ота түрлеріне лапароскопиялық гемиколэктомия, лапароскопиялық іш қуыс шатаралық тікішек резекциялар, лапаротомдық тік-ішек және тоқішектің резекциясы мен лимфодиссекциялары тоқ ішек және тікішектің кез келген анатомиялық ем жатады. Дәрігердің айтуынша, ауруханада 2024 жылы 100-ге жуық ота жасалған. Таргентті препараттарды қолдану алдында науқастарға заман талабына сай иммунды гистохимиялық молекулярлы генетикалық талдаулар жүргізіледі. Талдаулардың патологиясына сай обырдың мутациялық деңгейіне арналған препараттар қолданылады.
Брифингте журналистер спикерден медициналық туризм бойынша ем жүргізудің нәтижесі жайлы сұрады. Мадияр Аманкелдіұлының айтуынша, бұл жүйе бойынша 300-ге жуық адамның емге келгені айтылды. Сондай-ақ жасөспірім қыздарға онкологияға қарсы екпе жасатудың нәтижесі жайлы да әңгіме қозғалды. Екпе жасалып жатыр, бірақ келушілер аз екендігі сөз болды.
Гүлжан ТҰРСЫН
Фото:gkb-31.ru
