Рәміздер күніне орай аудандық кітапхана қызметкерлері мен «Мейірім» Жаркент арнаулы әлеуметтік қызмет көрсету орталығының бірлесе ұйымдастыруымен «Мемлекеттік рәміздер – Тәуелсіздік пен тұрақтылық негізі» атты мерекелік кеш өтті.
Шарада мемлекеттік рәміздердің қадірі мен қасиеті жайлы жан-жақты айтылып, орталықтың әлеуметтік жұмыстар жөніндегі орынбасары Бисара Нұрсадыққызы, кітапханашылар Мадина Скакова, Әсел Мырзағалы, Арайлым Бекбатыр «Еңселі елім» тақырыбында әдеби бейнекөріністі көпшіліктің назарына ұсынды.
Аудандық кітапхананың әдіскері Кенже Илимахунова көпшілікті мерекемен құттықтап, ақжарма тілегін арнады. «Арайлы азаттығымыздың кепілі – Мемлекеттік рәміздер. Бұл күн – ақталған үміт күні болып біздің егемен Қазақстан тарихының төрінен орын алды. Тәуелсіздігіміздің тұмарына айналған мемлекеттік рәміздерімізді құрметтеу әрбір азаматтың парызы», – деп Мемлекеттік рәміздердің адам баласы үшін ғана емес, қоғам үшін де маңыздылығын атап көрсетті. Кеш орталықтың әдіскері Арман Саурықов орындаған «Атамекен» әнімен аяқталды.
Ақниет ТҰРҒАНОВА
Панфилов ауданы
