Қазақстанда газбен жүретін автокөліктердің саны 677 мың бірлікке жетті. Бұл туралы Үкімет отырысында Энергетика министрі Ерлан Ақкенженов мәлімдеді, деп хабарлайды 7-su.kz желілік басылымы.
Министрдің айтуынша, Ішкі істер министрлігінің деректеріне сәйкес, 2024 жылы газбен жүретін көлік саны өткен жылмен салыстырғанда 16 пайызға артқан. Бұл өсімнің басты себебі – сұйытылған мұнай газының (СМГ) бағасының салыстырмалы түрде төмен деңгейде болуы.
– Сұйытылған газ бағасының төмен болуы автокөлік иелерін осы отын түріне көшуге ынталандырып отыр. Бұл өз кезегінде тұтыну көлемінің артуына әкелуде, – деді Энергетика министрі.
Бүгінде Энергетика министрлігі өңірлерге ай сайын шамамен 130 мың тонна сұйытылған газ жеткізеді. Алайда бұл көлем өңірлердің сұранысынан 25–30 мың тоннаға немесе шамамен 23 пайызға төмен.
Министрліктің мәліметінше, қазіргі таңда газ тұтыну көлемінің артуы энергетикалық инфрақұрылым мен жеткізу жүйесіне қосымша жүктеме түсіріп отыр. Осыған байланысты ведомство сұйытылған газды тарату тетіктерін жетілдіру бойынша жұмыстар жүргізіп жатқанын атап өтті.
Фото: primeministr.kz
