Талдықорғанда оқушылар арасында қала әкімінің кубогі үшін дәстүрлі «125 CUP III» атты пікірсайыс турнирі өтті. «Әдеп-құқық жұмысы жөніндегі ментор» жобасы аясында өткен додаға шаһардағы 18 мектептен қатысты.
Турнирдің өтуіне Талдықорған қаласының әкімдігі, Жетісу облысының «Jetіsý» jastary» КММ-нің «Әдеп-құқық жұмысы жөніндегі ментор» жобасы, «Жетісу жастары ұйымының Конгресі» жастар қоғамдық бірлестігі, «125 high school Taldyqorgan» мектебінің «Sоzteaet» пікірсайыс клубы мұрындық болып отыр. Негізгі мақсат – сайысқа қатысушылардың лингвистикалық, әлеуметтік-мәдени, коммуникативтік құзыреттіліктерін дамыту. Сондай-ақ, қазіргі қоғамның және әлемдік қауымдастықтағы мәселелерді талқылап, оқушылардың әлеуметтік-шығармашылық белсенділігін арттыру. Тарихты тануға мүмкіндік тудыру.
– Бұл жерде оқушылар ментор жобасының 9 бағыты бойынша сынға түседі. Яғни, кибербуллинг, буллинг, нашақорлық, лудомания, креативті ойлау, қоғамда, мектеп қабырғасында орын алып жатқан келеңсіз жағдайларға байланысты тақырыптар негізінде пікір алмасатын болады. Мұнда қатысушылар тек сөз таластырып қана қоймайды. Олардың өзара қарым-қатынасы нығаяды, сыни ойлау қабілеттері дамиды. Балалар ойында бәсекелес болса да осындай пікірталас алаңдарынан дос тауып жатады. Бұл шара бір реттікпен ғана шектеліп қалмайды, алдағы уақытта әр тоқсан сайын өткізуді жоспарлап отырмыз, – дейді Әдеп-құқық жұмысы жөніндегі ментор жобасының кеңсе жетекшісі Дәулет Сағынай.
Бәсеке Американдық-парламенттік (АПФ) және Линкольн-Дуглас (ЛД) форматтарында өтті. Жарыс қорытындысы бойынша I орынды БИЛ «AY’S» фракциясы, II орынды 29-мектептің «IQAP» фракциясы, III орынды №19-мектептің «Жалын» фракциясы жеңіп алды. Додада Амина Манапбай «Үздік спикер», Мейрамбек Омархан «Үздік төреші» номинацияларын иеленді. Жеңімпаздар Алғыс хат және ақшалай сертификаттармен марапатталды.
Айта кетейік, «Әдеп-құқық жұмысы жөніндегі ментор» жобасы шеңберінде бұл күні облыс бойынша 108 ментор жұмыс істейді. Оның 31-і Талдықорғандағы білім ошақтарында қызмет атқаруда.
Медет ЖҰМАБАЙ
