Көксулық Қуат Қибат заманауи суару жүйесін ойлап тапқан. Ол өзі құраған құрылғысының арқасында бір бұлақтың суын компьютер арқылы басқарып, құм ішіндегі 200 гектар жерді игеріп отыр. Тамшылатып суарудың жаңа әдісін тапқан мұраптың егіні жайқалып тұр.
Егінші ойлап тапқан техникалық құрал бірнеше жұмысты бірден атқарады. Тұқым себеді, арам шөптің қаптап кетпеуі үшін жылтыр төсегіш төсейді. Бұдан бөлек, суды үнемдей- тін тамшылатып суаруға арналған жіңішке құбырды салып шығады. Мұнымен тәулігіне 24 гектар егістік алқапты сумен қамтуға болады. Сондай-ақ тыңайтқышты себуге арналған сандығы да бар.
Қуат Қибат шөлейт жерде егін егіп еңбектің ебін тапқан жан. Алғашында айналасындағылар істеген ісінің бос әурешілік екенін айтқан. «Шығынға ұшырайсың», деп те ескерткен көрінеді. Алайда көптің дегеніне көнбеген ол тәуекелге бел буып, егін егеді. Қазіргі уақытта жаңа техниканың арқасында егіні көктеп тұр. Көңілі қуанышқа толы.
– Мен бұл техникамен 8 сағатта 12 гектар алқапты суарамын. Суды ысырап қылмай, үнемдеуге пайдалы. Жалпы мұндай құрылғыны қытайлар көптеп ойлап табады. Қазақстанда жұмыс істетіп жатқан бірінші адаммын. Қазір бұл құрылғымен күнбағыс алқабын тамшылатып суарып отырмын. Болашақта кәсібімді ұлғайтсам деген мақсатым бар, – дейді «Қибат» шаруа қожалығының басшысы Қуат Қибат.
Оның айтуынша, бұрындары бір құлақ сумен бір гектар жерді бірнеше күн суаратын болған. Егінші бұл құрылғы арқылы 200 гектар жерді 8 күнде суарады екен. Егінді дәрілеу кезінде адам күші қажет емес екенін айтады. Техниканы да бір батырмамен басқарады.
Қуат Қибат тоқ көзі болса мұндай мүмкіндікпен екі мың гектар жерді игере алатынын айтады. Әзірге электр қуатын жанармай арқылы істейтін мотор арқылы алып отыр. Ол өз ісін әрменқарай ұлғайтуға үкімет тарапынан қолдау болса дейді.
Медет ЖҰМАБАЙ
