Алдымен қаладағы «Бірлік»,«Құлагер» ықшам аудандарына атбасын тіреген Ернат Дүйсенбекұлы аталған аумақтардағы көпқабатты үйлер мен жаңа саябақтың құрылысын көзбен көрді. Сонымен бірге іргетасы енді қалана бастаған көркем гимнастикаға арналған спорт кешенінде болып, жобаның жүзеге асу барысына назар аударды. Әрі аталған құрылыс алаңдарындағы қойылған әр кірпішке дейін жіті қадағалап шыққан қала әкімі жауапты мердігер мекеме басшыларына қолға алынған жұмыстардың қарқынын бәсеңдетпей сапаға баса мән беріп, уақытылы аяқтауды ескертті. Осыдан соң аймақтағы «Ұлан», «Жұлдыз» және «Жетісу» шағын аудандарына да барып, аулаларды абаттандыру мәселелерін де пысықтады. Сөз кезегінде ол өткен жылы бұл шағын ауданның халқы үшін заман талабына сай жабдықталған теңдесі жоқ аулалар жұрт игілігіне берілгенін атап өтіп, сол үрдіс биыл да жалғасып жатқанын жеткізді. Сапарыны соңында қала әкімі орташа жөндеу жұмыстары жүргізіліп жатқан шаһардағы Рүстембеков және Гагарин көшелеріне бұрылып, жауаптыларға барлық техникалық талаптардың сақталуын қамтамасыз етуді тапсырды.
– Биыл қаламызда салынып жатқан құрылыс нысандарының саны артқан. Олардың басым бөлігі – жұрт игілігіне бағытталған жобалар. Сонымен қатар 70 шақырымнан астам жолды жөндеуді жоспарлап отырмыз. Осылайша, жол инфрақұрылымын жақсартып, әлеуметтік маңызы бар нысандарды көптеп салу көзделген. Бұл бағыттағы жұмыстар кезең-кезеңімен және жүйелі түрде жүзеге асырылатын болады, – деді Ернат Бәзіл.
Сала жауаптыларының сөзінше, ел Президентінің тапсырмасына сай мұқтаж жандарды тұрғын үймен қамтамасыз етіп, халықтың өмір сүру сапасын көтеру басты күн тәртібінде. Сондықтан бүгінде өңірде мемлекеттік бағдарламалардың арқасында көптеген оң бастамалар қолға алынғана. Ал, қазір Талдықорған қаласы бойынша тұрғын үй кезегінде тұрған адам саны 15 мыңнан асады. Осыған дейін олардың бірқатары қоныстойын тойлаған. Қолданысқа берілген үйлердің біразы жергілікті бюджет есебінен, тағы бір бөлігі жеке кәсіпкерлер мен меценаттардың жеке қаражатына тұрғызылған. Әр жылы аймақта 2 мыңнан астам адамды баспанамен қамту көзделіп, алдағы бірнеше жылда кезекте тұрған азаматтардың басым көпшілігін тұғын үймен қамту жоспарланған.
Айдын КӘЛІМХАН
