Дарқан даланың боз жусаны мен бетегесінің жұпарынан тартып туған елінің асқақ та арда тұсы мен күллі қасиетін домбыраның шанағынан күй қылып көмкере саз өнеріне жауһар қылып ұсынған жаратылысқа аттай 100 жыл. Әлқиса тарихымыздан тартып ата толғауындай мұраларымыздың бәрін күй қылып түлеткен тұлғаның ғасыр тойын жетісулықтар айрықша атап өтті. Бүгін Талдықорған төрінде ұлы композитордың ескерткішіне гүл шоқтары қойылып, рухына тағзым жасалды. Телегей туындыларының бірқатары жүректерді шымырлатып, жанға рухани күш дарытты.
Саф өнердің сарқылмас мұрасын солақайымен-ақ ұлы биіктікке көтерген композитор, дирижер, КСРО-ның халық әртісі һәм Қазақстанның Халық қаһарманы Нұрғиса Тілдендиевтің ғасыр тойы облыс орталығындағы композитор атындағы музыка мектебінің алдында бастау алды. Алдымен облыс әкімінің орынбасары Диас Есдәулетов бастаған Ермек Келемсейіт, Ақшабай Керімбеков, Әли Алпысбаев, Серік Нұрхалық секілді зиялы қауым өкілдері мен өзге де өнерпаздар ұлы компазстордың ескерткішіне гүл шоқтарын қойды.
– Биыл ЮНЕСКО көлемінде Нұрғиса жылы аталып өтеді. Бұл ғасырда бір туар саз өнерінің саңлағына ғана емес, күллі қазаққа берілген айрықша баға. Дүбірлі той дүниежүзілік деңгейде атап өтілетін болса, бүгін облысымызда салтанатымен шымылдығын түруде. Тарихтың өзі сабақтасып жатқан ұлы құндылық десек, Нұрғиса Атабайұлының ғасырлық тойы Ұлы Жеңістің 80 жылдығымен де тұспа-тұс келіп отыр. Біз Н. Тілендиевті Отан соғысына қатысқан жаужүрек майдангер екенін білеміз, – дей келе көпшілікті жүйесі мен күйиесі, ырысы мен тынысы бір руханияттағы айшықты тоймен құттықтап өтті. Ұлы композитордың өмір жолы мен шығармашылығы хақында тебірене толғанды.
«Ататолғау» күймен бастау алған Н. Тілендиев атындағы музыка мектебі алдындағы керекелік шара Дәнеш Рақышаев атындағы облыстық филармониясының концерттік бағдарламасына ұласты.
Асыл Сұлтанғазы
Фото: Дмитрий Ерофеев
