Қай салаға да прогресс керек. Ғылым мен ілім қажет. Жаһандану дәуірінде үдерістің бір орнында тұрмайтыны секілді тәжірибе алмасу, үйрену, жаңа технологияларды меңгеру керек. Күнде түрленген әлемде азық-түлік қауіпсіздігін қамтамасыз ету кез келген мемлекеттің басым саясаты. Бұл ретте әрбір ел өз ауыл шаруашылығына үміт артады. Ал заманауи үдерістен кеш қалған сала сол қауіпсіздікті қамтамасыз етуі екі талай. Ескі-құсқы техникамен, заманауи технологияларсыз ауылшаруашылығында мол өнім алу қисынсыз. Мұнан өзге, жерден елдің ырыздығын жинап жүрген дала еңбеккерлеріне тәжірибе алаңы да ауадай қажет.
Бірінде барды бірі үйреніп, ой бөлісіп, пікір алмасу үшін. Осы орайда облыс әкімдігінің мұрындық болуымен «Алқап күні» өтті. «Август-Қазақстан» компаниясымен бірлесе ұйымдастырған тәжірибе алаңы Ескелді ауданына қарасты Бақтыбай ауылындағы «Дүйсенбинов А.К» шаруа қожалығы болды.
Жалпы, шараның мақсаты – ауылшаруашылығы дақылдарын өсіру саласында тәжірибе алмасу, заманауи агротехнологиялар мен жоғары өнімді ауылшаруашылығы техникасының үлгілерін көрсету. Облыстық ауылшаруашылық басқармасының басшысы Нұрдәулет Кененбаевтің айтуынша, жыл сайын «Алқап күнін» өткізу арқылы өңір шаруалары жаңа мүмкіндікке қол жеткізуде. Биыл облыс дала еңбеккерлері 510,7 мың гектарға дән еккен. Оның 200 мыңы суармалы егістік. Бірер жылдың көлемінде зығыр, үрмебұршақ, рапс сынды дақылдарды егуді қолға алуда. Биыл «Дүйсенбинов А.К» шаруашылығы 500 гектарға зығыр орналастырыпты. Осыны тілге тиек еткен басқарма басшысы мұндай дақылдардың экономикалық мүмкіндігі зор екенін алға тартты.
– Бұл дақылдар фермерлер үшін экономикалық тұрғыдан тиімді. Сонымен қатар, бүгін біз суарудың дискретті әдісін ұсынып отырмыз. Бұл суды үнемдейтін технология, оны қолдану оңай әрі қолжетімді. Осы шара арқылы өңір шаруаларын жаңа дақылдарды егуге бағыттауды көздеудеміз. Оның үстіне «Август-Қазақстан» мекемесі жаңа өнімдерін ұсынуда, – дейді Нұрдәулет Кененбаев.
«Дүйсенбинов А.К» егін һәм мал шаруашылығын түлетіп отырған бірден-бір ірі қожалық. Қазіргі таңда мемлекеттің қолдауы нәтижесінде техникалық базасын жаңартты. 80 адам нәпақа тауып отырған қожалықтың азықтық қор сақтайтын 2 қоймасы бар. Уақыт үдерісіне үн қосқан қожалықтың алқабында мұндай шараны ұйымдастырудың мәні осымен айшықталса керек.
– Алғаш рет зығыр, үрмебұршақ, рапстың неміс сортын септік. Бұл тиімділігі жоғары дақылдар аймақтың климаттық жағдайларына төзімді әрі оларға деген нарық сұранысы жоғары. Бүгінде біздің иелігімізде 4 шаруашылық, 50 бірлік ауылшаруашылығы техникасы бар және 50 адам тұрақты жұмыспен қамтылған, – дейді шаруашылық басшысы Айдын Дүйсембинов.
«Алқап күні» аясында шаруалар жаңашылдық пен жаңа технологияларды меңгерді. Мұндай шаралар дала еңбеккерлерінің әр күнін өнімді етуге бағдарланған.
Дастанбек Садық,
Ескелді ауданы
