Қазақстанда әрбір азаматтың су айдындарын демалу, серуендеу, шомылу немесе әуесқой балық аулау үшін еркін пайдалану құқығы бар. Бұл – заңмен қорғалған барық адамға тиесілі.
Заңда нақты тыйым көрсетілмеген жағдайда, жағалауға қоршау қою, шлагбаум орнату немесе «өтуге тыйым салынады» деген белгілер арқылы халықтың жағалауға жақындауын шектеуге ешкімнің құқығы жоқ.
Мемлекет жағалауға кіруді тек ерекше жағдайларда ғана уақытша шектей алады. Мысалы:
– халық денсаулығын қорғау үшін;
– қауіпсіздік талаптарына байланысты;
– табиғатты сақтау мақсатында;
– су азайған кезеңдерде.
Алайда мұндай шектеулер міндетті түрде БАҚ-та, мемлекеттік органдардың ресми сайттарында жарияланып, жағалауда арнайы белгімен көрсетілуі тиіс.
Заң бойынша су қорғау аймақтарында күрделі нысан салуға болмайды. Бірақ жағажайлар, спорт және ойын алаңдары, аквапарктер, демалыс орындарын орналастыруға рұқсат етіледі. Кәсіпкер өз учаскесін қоршай алады, бірақ ол азаматтардың су айдынына еркін өтуіне кедергі келтірмеуі міндет.
Егер жағалау толық қоршалып, өту мүмкін болмаса, жер пайдаланушы тұрғындарға суға шығатын жолды міндетті түрде қамтамасыз етуге тиіс.
Маңызды:
Су жағасына өтуді ақылы ету – заңсыз.
Тек жағажай немесе демалыс аймағы көрсететін қызмет үшін ғана ақы алынуы мүмкін.
Сондай-ақ су айдындарының маңында көлік жууға, жанармай немесе химиялық заттар сақтауға және экологияға зиян келтіретін кез келген әрекетке тыйым салынады.
Ортақ су айдындары – барлық азаматқа қолжетімді болуы тиіс. Өз құқықтарыңызды біліңіз және қорғаңыз.
Дереккөз: Қазақстан Республикасы Су ресурстары және ирригация Министрлігі
