Көп жылдан бері Жамбыл ауылында тұрамын. Балаларым да осы жерде дүниеге келді. Мұндағы емхана дәрігерлері тұрғындардың уақытында екпе алып, скринингке баруын қадағалайды. Барсаң барынша ілтипатпен жауап беріп, сырқатыңнан айығуыңа жәрдемдеседі. «Аурудың емі – саудың сәлемі» деген емес пе?! «Тәте, жазыласыз, жақсы боласыз» десе соған қуанамыз.
Емін уақытында алып, алдағы жақсы күнге үміттенеміз. Бірнеше жылдан бері қан қысымым көтеріліп, салдарынан басым айналатынды шығарды. Жүрек-қантамырларында тромбы пайда болып, жүрегіме ота жасалды. «Жедел жәрдем» жиі шақырамын. Сонда ауыл дәрігерлері дәрісін беріп, қан қысымым қалпына келгенше қасымда болады. Бірақ, елді мекен емханасы әбден ескірген еді. Жылыту да қиындық тудыратын. Іші қаракөлеңке болып тұратын. Бүгінде ауылға жаңа фельдшерлік-акушерлік пункт тұрғызылды. Тұрғындардың ем алуына жайлы жағдай жасалды. Барлық құрал-жабдық сатып алынды. Екпе жасайтын арнайы бөлме бар. Әйелдер мен балаларға арналған тексеру кабинеттері жабдықталды. Жарық, жылы мекеме қаланың емдеу орнынан бір кем емес.
Елді мекенде 1000-ға тарта тұрғын бар. Дәрігер Хамида Тоқтағұл 15-16 жыл бір жерде жұмыс істейді. Ыждағатты, елдің көңілінен шыға білген абзал жан. Фельдшерлер Жанна Қызайбаева мен Ылғар Қызырқазықызы өз ісінің білгір мамандары. Күн-түн дамыл көрмей қызмет етеді. Акушер Дильназ Сатқанғұл көптеген баланың кіндік анасы. Тазалықшы Анархан Аяпбергенованың да еңбегі зор. Ол фельдшерлік-акушерлік пунктте 20 жылға жуық талмай еңбек етіп келеді.
Жаңа емхана салынғалы қызмет көрсету сапасы жақсарды. Себебі, ем жасау үшін дәрігерлерге де жағдай жасалды. Заманға сай жабдықталды. Ауыл тұрғындарына осындай жағдай жасап жатқан әкімдікке, медицина саласының мамандарына айтар алғысымыз шексіз.
Тамара Қасымова,
Көксу ауданы
