Мемлекет басшысының Жарлығымен қайта құрылған Жетісу облысының құрылғанына биыл үш жыл толып отыр. Қысқа мерзім ішінде өңір әлеуметтік-экономикалық даму көрсеткіші бойынша еліміздің үздік үштігіне енді.
Бұл туралы 7-su.kz ақпарттық порталы «Qazaqstan» Ұлттық телеарнасының дерегіне сүйеніп хабарлайды.
Облысқа осы уақыт аралығында 1,2 трлн теңге инвестиция тартылып, 3 500-ден астам жаңа жұмыс орны ашылған. 2022–2024 жылдары жалпы құны 135 млрд теңгеден асатын 135 жоба жүзеге асқан. Оның ішінде, тек «Қорғас – Шығыс қақпасы» арнайы экономикалық аймағында 30 инвестициялық жоба іске қосылып, 2 мыңға жуық тұрақты жұмыс орны құрылды. Бұл кәсіпорындар жыл сайын 81,6 млрд теңгенің өнімін шығарып, қазынаға 9 млрд теңгеден астам салық түсіреді.
Арнайы экономикалық аймақта бүгінгі күні 28 инвестициялық жоба іске асып, 113 млрд теңге пайда әкелді. Оның сыртында 1000-ға жуық жұмыс орындары ашылды. Бүгінде сол аймақтарда қосымша 40 жоба іске асуда. Осының бәрі Жетісу облысының әлеуметтік экономикалық әлеуетін арттырады деп ойлаймын, — дейді ҚР Парламенті Сенатының депутаты Ғалиасқар Сарыбаев.
Ауылшаруашылығы саласында да серпін байқалады: облыста өндірілген өнімнің 65 пайызы қайта өңделеді. Газдандыру деңгейі 58 пайыздан асып отыр. «Талдықорған – Үшарал» магистральді газ құбырының құрылысы аяқталуға жақын. Бұл жоба іске қосылған жағдайда 192 елді мекен газға қосылады.
Облыстың білім саласында да айтарлықтай өсім бар: соңғы үш жылда 20 жаңа нысан, соның ішінде 15 мектеп пайдалануға берілген.
Ал ҚР Парламенті Мәжілісінің депутаты Болат Керімбек болса:
Тағы бір айта кететін дүние. Осы мына біздің тау туризмінде қолға алып жатқаны қуантады. Мысалы осы Жетісу Алатауының мүмкіндігі тау туризмін алдағы уақытта басқаша дамуына бір ерекше қарқын береді деп ойлаймын, — деп ойымен бөлісті.
