Жетісу облысының Текелі қаласындағы «Бастау» жазғы лагерінде жасөспірімдер арасында есірткі қылмысының алдын алуға бағытталған профилактикалық іс-шара өтті.
Кездесуді Жетісу облыстық Полиция департаментінің есірткі қылмысына қарсы іс-қимыл басқармасы мен Есірткі құқық бұзушылықтарының алдын алу кеңесі ұйымдастырды. Шара «Есірткіге жол жоқ!» атты ұранмен өтті.
Профилактикалық топ құрамына «Жақсылық жаса» қоғамдық бірлестігінің төрағасы, облыстық психикалық денсаулық орталығының нарколог-дәрігері және құқық қорғау органдарының өкілдері енді. Олар жасөспірімдерге есірткі мен психобелсенді заттардың зияны туралы түсінікті әрі тартымды форматта ақпарат беріп, салауатты өмір салтының маңыздылығын жеткізді.
Іс-шара аясында лагерь қатысушылары арасында спорттық жарыстар мен есірткіге қарсы тақырыптағы сурет байқауы ұйымдастырылды. Сонымен қатар, полиция қызметкерлері жастардың құқықтық сауаттылығын арттыру мақсатында ақпараттық түсіндіру жұмыстарын жүргізді. Олар тыйым салынған заттарды қолданудың денсаулыққа және заң алдындағы жауапкершілікке қатысты салдарын нақты мысалдармен түсіндірді.
Кездесу ашық әрі достық атмосферада өтті. Кеңес мүшелері балалармен еркін пікір алмасып, өз тәжірибелерімен бөлісті. Жасөспірімдер зиянды әдеттерден арылу жолдары мен спортты таңдау артықшылықтары туралы пайдалы кеңестер алды.
Шара соңында барлық қатысушылар бірігіп, «Есірткіге жол жоқ!» атты ұранмен флешмоб ұйымдастырып, есірткісіз өмірді таңдауға шақырды. Балаларға осы таңдаудың маңызын еске салатын естелік сыйлықтар табысталды.
