Polisia.kz мәліметінше, Жетісу облысында киік мүйіздерін заңсыз сатумен айналысқан күдікті ұсталды.
Операцияны облыстық полиция департаментінің ұйымдасқан қылмысқа қарсы күрес басқармасы облыс прокуратурасы мен ҚР ҰҚК шекара қызметі департаментімен бірлесіп жүргізген.
Оқиға Текелі қаласы аумағында орын алған.
Күдікті – Теміртау қаласының тұрғыны. Оның Subaru маркалы автокөлігіне тінту жүргізу барысында скотчпен оралған үш картон қорап табылып, ішінен 300-ден астам киік мүйізі тәркіленген.
Мемлекетке келтірілген шығын – 539 667 000 теңге.
Барлық айғақ заттар сот сараптамасына жіберілді. Қазіргі таңда күдіктіге қатысты тергеу амалдары жүргізілуде. Ол үйқамаққа алынған.
Қазақстан заңнамасына сәйкес, браконьерлік үшін жеті жылға дейін бас бостандығынан айыру жазасы қарастырылған. Сонымен қатар мүлікті тәркілеу мен белгілі бір лауазымды қызметтерді атқаруға бес жылға дейін тыйым салу шарасы да қолданылуы мүмкін.
Құқық қорғау органдары тергеуді жалғастыруда.
