Жетісу облысының дарынды оқушылары робототехникадан республикалық байқауда топ жарып, халықаралық аренада ел намысын қорғауға жолдама алды. 2025 жылғы Fibonacci Robot Olympiad республикалық кезеңінде біздің өңірдің командасы Робо-футбол номинациясы бойынша 1-орынға ие болып, Италияда өтетін Әлем чемпионатына қатысу мүмкіндігіне қол жеткізді.
Бұл жеңіс – заманауи білім мен технологияға қызығушылық танытып, тынымсыз еңбек еткен жастардың және олардың жетекшісінің табандылығы мен кәсібилігінің нәтижесі.
Жарысқа дайындық бірнеше айға созылды. Роботтардың қозғалысын, бағдарламалануын жетілдіру, стратегия құру – барлығы үлкен қажыр мен білімді қажет етеді. Нәтижесінде біздің команда байқау барысында қарсыластарына дес бермей, шеберліктерін дәлелдеді.
Сонымен бірге, республикалық деңгейде жаттықтырушыларға арналған жарыста да Жетісу облысының өкілдері 2-орынды иеленді. Бұл – өңіріміздің робототехника саласында жүйелі жұмыс істеп келе жатқанын, әлеуеті жоғары екенін тағы бір рет көрсетті.
Жеңімпаз команданың жаттықтырушысы – Болат Сәтжан Озатұлы. Оның жетекшілігімен өз білімін ұштап, шеберлігін арттырған жас робототехниктер:
- Қадырхан Ермұхамед
- Омархан Джемаль
- Ясын Нұрасыл
- Аманбол Әлинұр
Бұл балалардың табысы – олардың ата-аналарының қолдауы мен ұстаздарының бағыт-бағдарының жемісі. Жетісулық жастардың бұл жеңісі – елімізде инженерлік және ІТ бағыттағы мамандықтарға деген сұраныстың артқанын, жаңа буынның заманауи технологияны игеруге деген ынтасының жоғары екенін көрсетеді. Мұндай жетістіктер болашақта елімізді технологиялық тұрғыдан дамыған мемлекеттердің қатарына қосатын білікті кадрлардың өсіп келе жатқанын аңғартады.
Жетісу облысы білім саласының өкілдері жеңімпаздарды, олардың ата-аналарын және жетекшілерін шын жүректен құттықтады.
– Италияда өтетін байқауда да сенім үдесінен шығып, Қазақстанның туын желбіретеді деп сенеміз. Болашақ инженерлерге шабыт пен табыс тілейміз! – делінген құттықтауда.
Сонымен қатар білім басқармасы атынан Ляззат Сарқытбайқызы да құттықтау сөзін жолдап, Жетісулық оқушылардың бұл жеңісі – өңірдің үлкен мақтанышы екенін атап өтті.
Жетістіктеріңіз толастамай, биік белестерді бағындыра беріңіздер! Сәттілік пен шабыт серіктеріңіз болсын!
