Облыстық ауылшаруашылығы басқармасының ақпараты бойынша, биыл аймағымызда 966 мың гектар жерге дән себу жоспарланған. Бұл өткен жылмен салыстырғанда 5 мың гектарға артық. Бұл бағыттағы жұмыстарды Ескелді ауданының диқандары да қарқынды іске асыруда.
– Жалпы аудан бойынша биыл 1990 гектар алқапқа жаздық масақты дәнді дақыл, 12700 гектарға майлы дақыл себу жоспарланып, жұмыс белгіленген уақыт көлемінде толық аяқталды. Облыс бойынша биыл себілетін 16100 гектар қызылшаның 3417 гектары ескелділіктердің еншісіне тиді. Сондай-ақ, мың гектардан артық алқапқа көкөніс егілсе, сүдігір тырмалау, көктемгі жер жырту, күздік егістерге минералды тыңайтқыш беру ісі толығымен орындалды. Өткен жылға қарағанда егіс алқабының көлемі арта түскені анық. Бұл экономикалық дағдарыс тұсында ел-жұрттың қиындықты еңсеріп, тіршілігін түзеуге үлкен серпін әкелері хақ, – дейді Ескелді ауданы әкімінің орынбасары Ермек Әпеков.
Бүгінде егіс алқабындағы жұмыстың көрігін қыздырған диқандардың да көңілі шат. Әрине, көктемгі егіс жұмысы барысында төтенше жағдайға байланысты сақтық шараларының да ескерілгені белгілі. Бұл мәселе аудандық әкімдік тарапынан қадағаланып отырды. Осындай берекелі істердің нәтижесінде қиындықтан қиналмай шығатынымызды да аңғардық.
Қажет АНДАС
