Тамыз айының алғашқы аптасына дейін жүгерінің алғашқы суы толық берілді. 20 125 гектардан астам алқап екінші рет суарылып, 500 гектарға жуық жерге үшінші су беру жұмыстары жүргізілуде. Суару ісі Үшарал, Үлкеншыған, Бірлік, Басқұншы және Пенжім ауылдық округтерінде қарқынды жүргізіліп жатыр.
Жүгері толық пісіп-жетілгенше органикалық және минералды тыңайтқыштар беру, өсімдік ауруларына қарсы өңдеу секілді агротехникалық шаралар мінсіз орындалуы шарт. Бүгінде арамшөпке қарсы химиялық өңдеу толық аяқталды, тыңайтқыш енгізу мен шөптеу жұмыстары 100 пайызға орындалды.
Бірер аптадан кейін диқандар ерте пісетін сұрыптарды оруды бастайды. Алдағы науқанға дайындық аясында техника жөнделіп, жанар-жағармай қоры жасақталуда. Қырмандар тазаланып, астық қабылдауға дайындалуда. Соңғы жылдары аудан бойынша бірнеше қырманға жөндеу жұмыстары жүргізілді. Атамекен ауылындағы екі қырман күрделі жөндеуден өтіп, өткен жылы Алмалы ауылындағы қырманға 184,9 миллион теңге бөлініп, толық асфальтталды және астық қоймасы жаңартылды.
Мырзағали НҰРСЕЙІТ
