Бұқаралық спортты дамытуға ерекше көңіл бөліп отырған аймақтың бірі – Панфилов ауданы. Демеушілермен тығыз байланыс орнатқан аудан басшылығы тұрғындардың спортпен еркін айналысуына жағдай жасап келеді. Жақында Жаркент қаласында жабық жүзу бассейні ел игілігіне берілді. «Самат» жүзу орталығы» деп аталатын жаңа нысанды кәсіпкер Абай Жұрқабеков өз қаржысына салдырған.
Жаркенттегі жүзу орталығының ашылу салтанатына ҚР Туризм және спорт министрінің орынбасары Ержан Еркінбаев, облыстық дене шынықтыру және спорт басқармасының басшысы Ұлан Рысқұл, аудан әкімі Марат Сағымбек және өңірдің спортсүйер қауымы қатысты. Салтанатты шарада сөз алған аудан әкімі Марат Сағымбек Мемлекет басшысы Қасым-Жомарт Тоқаевтың елімізде бұқаралық спортты дамыту жөніндегі тапсырмасына сәйкес спорт кешендері кейінгі жылдары Атамекен, Үлкеншыған, Үшарал ауылдары мен Жаркент қаласында пайдалануға берілгенін атап өтті.
Жалпы көлемі 2 мың шаршы метрге тең жүзу орталығында 40 адам жұмыс істейді. Олардың жетеуі жаттықтырушы, екеуі құтқарушы болса, мүмкіндігі шектеулі жеткіншектерге медициналық көмек көрсететін мамандар арнайы дайындық курсынан өткен. Орталық 3 жасқа дейінгі, орта жастағы балалар және ересектерге арналған жүзу бассейндерін қамтыған 3 бөліктен тұрады. Күніне 70 адамды қабылдайтын жүзу орталығында мүмкіндігі шектеулі балалардың қозғалыс қимылдарын жаттықтыратын мүмкіндіктер қарастырылған. Ақылы қызмет көрсететін орталықта әлеуметтік әлсіз топқа жататын отбасының мүшелеріне жеңілдік беріледі.
– Жазиралы Жаркент өңірінде ел спортына өлшеусіз үлес қосқан дәулескер спортшы көп. Осы дәстүр жалғасуы керек. Келешекте балаларымыз биіктерді бағындыру үшін барлық талапқа сай, ыңғайлы әрі қолайлы жүзу орталығын салуды жөн көрдік, – дейді жабық орталықты салған кәсіпкер Абай Жұрқабеков.
– Келушілерге қолайлы болу үшін 30 адамға арналған кафетерий, киінетін орын, техникалық қауіпсіздік құралдары қарастырылған. Бұдан басқа, біз тірек-қимыл мүшелерінде ақауы бар балаларға қызмет көрсетуді жоспарлап отырмыз. Жаттығушыларға қызмет көрсету ақылы. Алайда әлеуметтік әлсіз топқа жататын отбасының балаларына жеңілдіктер бар, – дейді орталық директоры Қуаныш Абай.
Мырзағали НҰРСЕЙІТ
