Жетісу өңірінде «Бүгін – хобби, ертең – бизнес» бағдарламасы қарқынды жүзеге асырылуда, – деп хабарлайды 7-su.kz ақпараттық порталы.
Қызығушылықтан бастап кәсіпкерлікке дейінгі алғашқы қадамдарды қолдауға бағытталған жоба аясында ісін жаңа бастаған азаматтар дәріс тыңдап қана қоймай, өңірдегі жұмыс істеп тұрған өндіріс орындарына барады. Жетісу облысы Кәсіпкерлер палатасының Іскер әйелдер кеңесі облыстық Ішкі саясат басқармасының қолдауымен және «Азаматтық бастамаларды қолдау орталығы» КЕӘҚ гранттық жобасы шеңберінде арнайы оқыту семинарларын ұйымдастырды. Қыркүйек айының өзінде қатысушылар балық шаруашылығы, жылыжай ісі және киіз басу өнері бойынша білім алды, сондай-ақ алда сыр қайнату бойынша шеберлік сабағы жоспарланған.
Бағдарламаның басты ерекшелігі практикалық бағытында болып отыр. Солардың бірі «7су Балық» балық шаруашылығы базасында өтті. Кәсіпкер Мұрат Сейтхан мен оның ұлы Еламан отбасылық бизнесті жүргізудің қыр-сырын бөлісті. Болашақ балық өсірушілерге уылдырық инкубаторынан бастап арнайы бассейндер мен сорғы станцияларына дейінгі толық цикл көрсетілді. Балық өсіру кезіндегі басты шығын жемге кететіндіктен, «7су Балық» қожалығы оның бір бөлігін өзі өндіреді. Сондай-ақ шабақты 120-150 граммға дейін өсіру үшін 5-6 ай бойы судың температурасын, оттегі деңгейін және тазалығын үздіксіз бақылау қажеттілігі түсіндірілді. Тұқымды форельден бөлек, шаруашылық ақ амур, толстолобик және сазан балықтарын өсіреді.
Жетісу облысы Кәсіпкерлер палатасының директоры Дәурен Оңалбаев оқытудың теориямен шектелмей, нақты практикалық тәжірибе беруі маңызды екенін атап өтті. Мұндай қолдау азаматтардың өз күшіне сенуіне және хоббиін нақты бизнеске айналдыруға мүмкіндік береді. Қатысушылар да отбасылық шаруашылықпен танысу кәсіпті бастамас бұрын бағытты дұрыс таңдауға көмектесетінін растады.
Мұндай бастамаларды қолдау аймақ экономикасын дамытуға үлкен серпін береді. Жергілікті тұрғындар балық өсіру, көкөніс баптау немесе қолөнер сияқты сүйікті істерін табысты бизнеске айналдыру арқылы жаңа жұмыс орындарын ашып, ішкі нарықты сапалы отандық өніммен қамтамасыз етеді. Шағын және орта бизнесті дамытуға өңірлік бюджеттен жүздеген миллион теңге көлемінде қолдау көрсетіліп келеді.
