Желіде Жетісулық бойжеткеннің бейнеүндеуі кеңінен тарады. Онда ол белгісіз ер адамның өзін 16 жасынан бері мазалап, үнемі бақылауда ұстап жүргенін мәлімдейді, – деп хабарлайды 7-su.kz ақпараттық порталы.
Айтуынша, жағдай ұзақ уақыт бойы жалғасып келеді және бұл оның жеке қауіпсіздігіне алаңдаушылық туғызған.
Аталған бейнематериал алғаш рет «Письма президенту» Telegram-арнасында жарияланған. Жазбада оқиғаның Жетісу облысы аумағында болғаны көрсетілген.
– Бойжеткен бірнеше жыл бойы өзінен әлдеқайда үлкен ер адам қысым жасап жүргенін айтты. Оның айтуынша, ер адам оны 16 жасынан бері аңдып, қысым көрсеткен және жалған ақпарат таратқан, ал құқық қорғау органдары тиісті шара қолданбай отыр, – делінген жазбада.
Жетісу облыстық полиция департаментінің баспасөз қызметі бұл жағдайға қатысты түсініктеме берді. Ведомство мәліметінше, бұған дейін бойжеткен құқық қорғау органдарына ресми түрде жүгінбеген. Соған қарамастан, жарияланған деректер негізінде тиісті тексеру басталған.
– Қарау нәтижесі бойынша ер адам мамандандырылған медициналық мекемеге жатқызылды. Сонымен қатар 29 сәуірде Үшарал қаласының тұрғынынан сталкинг (аңду) фактісі бойынша арыз түсіп, соның негізінде қылмыстық іс қозғалды. Қазіргі уақытта сотқа дейінгі тергеу амалдары жүргізілуде, – деп хабарлады полициядан.
Қазіргі таңда аталған дерек бойынша қылмыстық іс қозғалып, мән-жайды анықтауға бағытталған тергеу амалдары жүргізіліп жатыр. Құқық қорғау органдары барлық қажетті шараларды қабылдап жатқанын хабарлады.
