Ата Заңның алғашқы бабында да «Мемлекеттің ең қымбат қазынасы – адам жəне адамның өмірі, құқықтары мен бостандықтары» деп тайға таңба басқандай жазылды. Яғни, еліміз ең бірінші орынға адамды қойды. Осыған орай, ҚР Адам құқықтары жөніндегі ұлттық орталығы мен Жетісу облысы бойынша ҚР Адам құқықтары жөніндегі уәкілінің өкілдігі заңға сәйкес түрлі шаралар атқарып, азаматтардың өтініштері қаралады.
Былтыр уәкілдің кеңсесіне 6,5 мыңнан астам өтініш түсіпті. Бұл 2023 жылмен салыстырғанда 11%-ға артық. Өтініштердің құрылымында тергеуге дейінгі іс жүргізу органдарының әрекетіне немесе әрекетсіздігіне, сотталғандардың құқықтарының бұзылуына және сот актілерімен келіспеуге байланысты шағымдар басым. Былтыр өтініштерді қарау аясында құқықтарды қалпына келтіру мақсатында 85 өтініш пен 307 ұсыныс жіберілді. Нәтижесінде 94 лауазымды тұлға тәртіптік жауапкершілікке, 5-еуі әкімшілік жауапкершілікке тартылған. Уәкіл өкілдерінің көмегімен 4 қылмыстық іс тіркелді.
Өтініштердің көбі полиция органдары жүргізетін тергеуге дейінгі іс жүргізу, сот орындаушыларының әрекеттері, тергеу изоляторларында тиісті медициналық көмектің көрсетілмеуі және тұрғын үй мәселелері бойынша түскен.
Жолданған өтініштердің 65-і қанағаттандырылды, 9-ы мемлекеттік органдар тарапынан ішінара қолдау тапты. Осылайша адамның және азаматтың бұзылған құқықтары мен бостандықтары қалпына келтірілді.
Қанат ҚАРЫМСАҚОВ,
ҚР Адам құқықтары жөніндегі уәкілдің Жетісу облысы бойынша өкілі
Фото: narko-zdrav.ru
