Жетісу облысының жолдарына қайтадан фоторадарлар, ел арасында «үш аяқты» (трехножка) атанып кеткен құрылғылар қойылады. Бұл туралы Жетісу облыстық полиция департаменті мәлімдеді.
Жыл басынан бері Жетісу облысының аумағында 443 жол апаты тіркеліп, 116 адам қаза тапқан. Тағы 716 адам түрлі дене жарақаттарын алған. Жол апатының негізгі себептерінің бірі — жүргізушілердің жылдамдық режимін асыруы.
«Осыған байланысты, облыс жолдарында жол-көлік оқиғаларының алдын алу, жол қозғалысына қатысушылардың өлімі мен жарақатын азайту мақсатында «КРИС-П» фоторадар жылжымалы кешені пайдаланыла бастады. Халық арасында «үш аяқты» деген атқа ие құрылғы жол ережелерін бұзғандарды автоматты бақылау үшін қолданылады», — деді Жетісу облыстық полиция департаменті өкілдері.
Айта кетейік, аталған құрылғы автокөліктерді фото және бейнетіркеу арқылы бақылайды.
«ЖЕТІСУ-АҚПАРАТ»
