2023-2024 жылдары облыстың Ескелді ауданы Бақтыбай ауылдық округінің 44 тұтынушысы жеке тұрғын үйлерге табиғи газ орнату бойынша «О» ЖШС кәсіпкеріне 12 миллион теңгеден астам сомаға өз ақшасын сеніп тапсырып, алайда 2 жыл ішінде кәсіпкер тарапынан шарттық міндеттемелер орындалмады.
Бұл жағдай қоғамдық наразылық тудырып, тұтынушылар телеарна, БАҚ, мемлекеттік органдардың өкілдерін шақырып, мәселелерді шешуге көмек сұрап, бұл мәселе ҚР МТИ сауда және тұтынушылардың құқықтарын қорғау департаменті Жетісу облысы бойынша ерекше бақылауға алынды.
2024 жылдың мамыр айында Департамент зардап шеккен тұтынушыларға құқықтық көмек көрсетті, ауыл тұрғындарына сотқа дейінгі шағым жасауға көмектесті.
Кәсіпкер «Тұтынушылар құқығын қорғау туралы» заңнаманың талаптарын елемеуіне байланысты Департамент «Әкімшілік құқық бұзушылық туралы» Қазақстан Республикасы Кодексінің 190-бабы 5-бөлігінің 3-тармақшасына сәйкес құқықтар мен заңды мүдделерді бұзушылықтарды жою туралы шағымға жазбаша жауап бермеу бойынша жоспардан тыс тексеру жүргізді және әкімшілік хаттама толтырды.
Осыдан кейін Департамент талапкер ретінде 44 тұтынушының атынан Талдықорған қалалық сотына талап арыз жолдап, Департамент тарапынан тұтынушылардың құқықтары қорғалып және көрсетілетін қызметті берушінің өз міндеттемелерін орындамағаны туралы барлық дәлелді құжаттар көрсетілді. Сот процесін жүргізу барысында кәсіпкер шарт бойынша жұмыстар толық жүргізілмегенін мойындап, қаражат қайтарылатынын хабарлады.
Талдықорған қалалық сотының 2024 жылғы 17 қазандағы шешімімен зардап шеккен 44 тұтынушыға қатысты Департаменттің көрсетілмеген қызметтер бойынша 12 699 000 теңге сомасында мүліктік зиянды өтеу міндетін жүктеу туралы талап арызын қанағаттандыру туралы және кәсіпкер тарапынан 44 тұтынушыға 12 699 000 теңге сомасында қаражат өндіріп алу туралы шешім шығарылды.
Қазіргі уақытта 44 тұтынушыға сот шешімдері мен атқару парағы берілді, жеке сот орындаушылары арқылы қызмет көрсетпеген кәсіпкерден қаражат өндіру жұмыстары жүргізілуде.
«Жетісу-Ақпарат»
