Адамзат тарихында көптеген қасіреттің себепшісі, түрлі зұлымдықтың негізі – апиын. Ғасырымыздың басты дерті – нашақорлық. Біреулер есірткі таратып, байлыққа кенеліп, белшесінен батып жүр. Ал қаншама жан бақытсыздыққа ұшырап, ажал құшуда.
Ел ішінде нашақорлар саны жыл сайын артуда, ал біз болсақ көрмеген, білмеген кейіп танытамыз. Өз басымызда болмаған соң өзгенің проблемасына жүрегімізді де, жанымызды да ауыртқымыз келмейді.
Есірткіге негізінен жасөспірімдер мен жастар еліктейді. Қай бала пысық, соңынан өзгелерді ерте алатындай қабілетті болса, соған ұқсағысы келіп ұмтылатындар қатары өседі. Оның бағыты дұрыс па, бұрыс па, оған ешкім көңіл аудармайды.
Нашақорлар неге көбейіп кетті? Оның себебі, бала тәрбиесіне көңілдің көп бөлінбеуінен. Жасыратыны жоқ, ата-аналардың көбі баласымен материалдық тұрғыда ғана әңгімелесумен шектеледі. Қарны тоқ, көйлегі көк. Баламен әңгімелесу, оны не толғандырып жүргені жайлы көп бас қатыра бермейміз. Көбінесе ауқатты отбасының балалары қарны тоқтықтан, істейтін ісі жоқтықтан кім көрінгенге ілесіп кетеді.
Нарколог дәрігерлер ата-аналарға балалардың кішкентай кезінен ішімдік, темекі, есірткі жайлы біліп, зиянын ұғынып өскендері дұрыс екенін айтады. Осыған байланысты, қоғамдық қасіреттің алдын алу мақсатында оқушылар арасында түсіндіру жұмыстары кеңінен жүргізіледі. Сондықтан жастарды спортқа, басқа да мәдени ұйымдарға тарта отырып, бос уақыттарын кіммен қалай өткізетіндігіне көңіл бөлінсе дегім келеді. Жеткіншектерімізді нашақорлықтан, жат мінез-құлықтан қорғайық!
Мақсат Бейбітұлы,
нарколог
Талдықорған қаласы
